Jam e martuar, por burrë nuk kam!

15 vjet martesë i kam kaluar me prindërit e burrit.

Ai shkoi në Perëndim një muaj pasi qemë martuar.

Në këto 15 vjet, të vetmet herë që e shihja ishin dy javë gjatë festës së Vitit të Ri.

Në atë kohë ai kishte pushim nga puna dhe vinte në Kosovë, ndërsa kohën tjetër jetonte atje.

Fatkeqësisht, 15 vjet ai nuk ka qenë kurrë për mua dhe çdo gjë që ka ndodhur këto kohë e kam kaluar e vetme: çdo sëmundje, mërzi, konflikt me prindërit e tij, çdo gëzim dhe hidhërim.

Gjatë kohës që ai vinte në shtëpi s’kishim shumë mundësi për dashuri, pasi ishim me njerëz në shtëpi dhe ai duhet të qëndronte me prindër se kishte mall, thua se për mua nuk kishte.

Imagjinojeni se sa rrallë kemi bërë dashuri, saqë unë nuk kam arritur të mbetëm shtatzënë dhe të kisha një fëmijë, të paktën, t’i përkushtohesha atij.

I kam kërkuar gjithmonë t’më merrte me vete, por ai më thoshte se nuk e bënte dot, pasi prindërit e tij janë të vjetër dhe kanë nevojë për ndihmë në shtëpi.

Gjithmonë më ka mbajtur me shpresën se edhe një vit do të qëndronte andej, sa të kursente para më shumë dhe do të kthehej këtu, përgjithmonë.

Qyqe vetë në shtëpi, me dy pleq!

Nuk kisha zgjidhje, edhe pse jeta ime ishte e njëjtë me atë të vjehrrës sime, e cila është 72 vjeçe.

Vitin që shkoi ka pasur probleme me punë dhe dokumente dhe as për Vit të Ri nuk erdhi.

Kjo e rëndoi edhe më shumë gjendjen time, jo vetëm se kisha mall për të, por edhe ndihesha si e braktisur.

Imagjinoni: T’i kaloni vitet më të bukura të jetës e mbyllur në shtëpi me dy pleq!

I thashë se do të aplikoja për vizë që të shkoja te ai, por më tha se nuk kisha ku të rrija atje, meqë ai rri në banesë me dy shokë.

Unë jam 36 vjeçe dhe, më besoni, jam thuajse në depresion.

Jam tmerrësisht e mërzitur dhe më duket vetja si një shërbëtore në shtëpinë e prindërve të tij.

Për fatin tim të mirë sivjet bashkëshorti im pranoi që të kërkoja punë, të cilën edhe e gjeta, gjë të cilën më parë nuk ma ka lejuar.

Tetë orë të ditës i kaloj në rrobaqepësinë ku punoj, por aty stresohem edhe më shumë kur shoh shoqet e mia që dalin, që i kanë burrat në shtëpi, dikush ka fëmijë, ndërsa unë jam si qyqe e vetme me dy pleq në shtëpi, të cilët kanë nevojë vetëm për shërbim.

E, trupi im kërkon kënaqësi…

Gjatë kësaj kohe, kur kthehesha në shtëpi, një burrë më vinte pas dhe flirtonte me mua.

Nuk i ktheva përgjigje, derisa më tha se nuk e meritoja jetën që bëja dhe se burri im ishte idiot që më linte vetëm.

Të them të drejtën, nuk durova dot pa reaguar dhe u ktheva dhe e shikova në sy.

Mendova që ai kishte të drejtë dhe i thashë se nuk ke ç’të bësh kur të qëllon fati i keq.

Dhe, që nga ajo ditë ai nisi t’më përshëndet çdo ditë dhe unë nisa t’ia ktheja përshëndetjen.

Një ditë nuk e di çfarë më tha truri, por pas pune dola me të.

Prindërit e burrit i lajmërova dhe u thashë se do të vonohesha në punë.

Qëndrova gjatë me të dhe iu betova vetes se do të ishte e vetmja herë.

U pendova më pas për atë që kisha bërë, por ishte e kotë: ajo që ndodhi nuk kthehej pas.

Tani e vuaj shumë atë që kam bërë edhe për faktin se durova 15 vjet pa burrë në shtëpi…

Prindërit e burrit e kanë kuptuar që nuk jam mirë, por ata mendojnë se jam mërzitur për burrin tim dhe i thonë atij në telefon që të vijë sa më shpejt.

E, mua më tmerron kthimi i tij, pasi kam frikë se ai mund ta kuptojë atë që kam bërë, apo ta marr vesh në ndonjë mënyrë tjetër.