Kurti: Zyrtarët që nënshkruan marrëveshjet në Munih, nuk kanë autorizim nga Qeveria e re

Kryeministri i Kosovës, Albin Kurti është deklaruar lidhur me marrëveshjet e arritura sot mes Kosovës e Serbisë, në kuadër të Konferencës për Siguri në Munih.

Por në reagimin e tij Kurti shprehet se pas formimit të Qeverisë së re zyrtarët që nënshkruan këto marrëveshje, nuk kanë qenë autorizuar për të firmosur këto ujdi, njofton Klan Kosova.

”Sot në Munih janë nënshkruar dy marrëveshje nga zyrtarë të autorizuar nga ish ministri Pal Lekaj dhe i gjithë procesi i negocimit është bërë para fillimit të Qeverisë sonë.

Së këndejmi, këta zyrtarë nuk kanë marrë autorizim nga Qeveria e re as për të negociuar e as për të nënshkruar marrëveshje”.

Kurti nga Facebook-u madje ka kërkuar transparencë pasi siç thotë ai, teksti i marrëveshjes nuk është bërë i njohur për publikun, njofton Klan Kosova.

”Për më tepër as teksti i marrëveshjes nuk është bërë i njohur për publikun e për Qeverinë.

Kanë qarkulluar drafte të ndryshme jozyrtare.

Sado që të gjitha lidhjet dhe avancimi i standardeve të infrastrukturës janë të domosdoshme për zhvillim të vendeve tona dhe pjesë e vizionit Evropian për bashkëpunim rajonal dhe marrdhënie të fqinjësisë së mirë, megjithatë është shumë me rëndësi që procesi të jetë transparent, rezultat i një negocimi të mirëfilltë dhe në respektim të plotë të sovranitetit dhe ligjeve të vendit, prioriteteve ekonomike dhe në harmoni me obligimet që dalin nga procesi i MSA-së.

Për më tepër, nëse bazohemi te një verzion i marrëveshjes, po qe se analizohet për nga rëndësia ekonomike, hekurudha për në Leshak është më me prioritet dhe më e levërdishme sesa ajo për Merdare.

Në procesin e tranzicionit të qeverisjes, ne jemi duke analizuar të gjithë hapat që janë marrë në të kaluarën dhe ministritë përkatëse janë të angazhuara që këtë ta trajtojnë me prioritet”.