Molliqaj: Albin, çfarë di ti për të bëmat e UÇK-së kur iu drejtove Thaçit me sugjerimin për të shkuar në Hagë

Kryetari i PSD-së, Dardan Molliqaj, përmes një postimi të bërë në Facebook, i ka reaguar liderit të VV-së, Albin Kurti rreth deklaratës së tij se presidenti Thaçi po e negocion një marrëveshje të dëmshme për Kosovës, për ta shpëtuar veten nga Gjykata.

Molliqaj thotë se tashmë është kuptuar se Kurti nuk sheh gjë tjetër veç interesin e tij politik.

Ky është postimi i plotë:

Shko Albin…

VV ka kohë që thotë se Hashim Thaçi po e negocion një marrëveshje të dëmshme për Kosovën, për ta shpëtuar kështu veten nga Gjykata.

Në këtë qëndrim, presupozimi është i qartë.

Sipas Kurtit, drejtori politik i UÇK-së, Hashim Thaçi qenka i fajshëm, pra paska bërë kr.ime lufte dhe prandaj po ikën prej gjykimit.

Albin, tashmë e kemi kuptuar që nuk sheh asgjë tjetër përtej interesit tënd politik.

Dikur thoshe se pushteti i VV-së nuk do t’i dorëzojë njerëzit e UÇK-së.

Për ta realizuar këtë interes, sot je në anën e atyre që akuzojnë UÇK-në.

Në anën e atyre që e shohin me përçmim luftën për liri.

Je vendosur në anën e atyre që luftën e UÇK-së e shohin si një shpërthim agresiv e të dëmshëm të disa katundarëve.

Albin, çfarë di ti për kr.imet e UÇK-së kur iu drejtove Hashim Thaçit me sugjerimin për të shkuar në Hagë?

A din edhe për ndonjë tjetër, apo veç për drejtuesin politik?

Siç duket, tash për tash ky po ta zë rrugën.

Shko Albin thuaj të gjitha, sepse edhe ashtu, me qëndrimet e tua, e ke vendosur veten në anën e atyre që duhet të ftohen si dëshmitarë.

Merri me vete edhe kolegët e tjerë të partisë:

Shkelzenin, Fatmiren, Liburnin, Hakiun etj. sepse në bazë të qëndrimeve të tyre, edhe ata duket se dijnë shumë.

Shko Albin, dhe trego që gjykimet politike bëhen të pranueshme vetëm atëherë kur t’i eliminojnë kundërshtarët politik.

Shko dhe trego që drejtësia edhe mund të jetë selektive përderisa të shërben ty.

Shko Albin se kompleksi yt me historinë atje shërohet.

Atje po e rishkruajnë historinë.

Tregoju në Hagë se historia duhet të ndryshohet, sidomos aty ku ti nuk je protagonist.

Trego se ajo duhet të rishkruhet, sidomos në pjesët ku emri yt nuk përmendet.