Rikthehet ‘taramelja’ e Piter Panit, por Xheisoni nuk është më ai që njihni

“Taramelja” nuk është më ai që njihni.

Jo vetëm që është një vit më i rritur, por edhe me një shkronjë më tepër.

Xheison Bafti, vogëlushi 9-vjeçar që mori vëmendjen e të gjithëve në sezonin e dytë të Piter Panit, është rikthyer edhe një vit më vonë.

Sonte, në natën e dytë të këtij edicioni, hapjen e bëri pikërisht ai, Xheisoni.

Por një vit më i rritur, një vit më i pjekur dhe, “për fatin tonë të keq”, pa T-në e tij karakteristike.

Sapo nisi prezantimin e tij, Alketa tha se personazhi që i bëri të gjithë për vete sezonin e kaluar, jo vetëm për të folurën karakteristike, humorin që krijoi, por edhe historinë e pazakontë familjare, tashmë nuk është më ai që kemi njohur: “Taramelja është rritur dhe tani i thotë të gjitha germat të sakta.

Edhe fjalët më K nuk i thotë më me T”, – tha moderatorja dhe menjëherë u shfaq në skenë Xheisoni.

Në një “test” të shkurtër me Alketën, Xheisoni i tha të sakta të gjitha fjalët, me të cilat ne kishim qeshur pa fund një vit më parë.

Edhe taramelet, tani janë karamele.

Sa keq…

Xheison ka nisur shkollën në Tiranë prej një viti tashmë, por tha se e merr malli për të gjithë shokët në Myshqeta, fshatin e tij të dashur, me fushat me gjelbërim e me ajër të pastër.