Secila parti e koalicionit do ta ketë nga një zëvendëskryeministër

Sot gjatë ditës është paralajmëruar se do të nënshkruhet marrëveshja e koalicionit LDK, AAK, NISMA, AKR, minoritetet e Lista Serbe.

Deri më tani, të gjitha këto parti kanë bërë të ditur se me dakordimin e ri, marrin nga një zëvendëskryeministër në qeverinë Hoti, ani pse nuk është bërë publike se cili do të jetë numri dy në ekzekutivin e ri.

Sa qeveria ishte formuar vetëm nga dy parti, postet më të larta në ekzekutiv i mbanin tre persona, Albin Kurti si kryeminisër, Avdullah Hoti si pasardhës i tij, në postin e zëvendëskryeministrit të parë, e pas tij të njëjtën pozitë e kishte edhe Haki Abazi.

Mirëpo, me marrëveshjen e re që rrodhi pas mocionit të mosbesimit për qeverinë Kurti, në karrigen e zëvendëskryeministrit është bërë e ditur se do të ulen nga një përfaqësues i secilës parti.

Deri më tani, vetëm partitë nga radhët e minoriteteve s’kanë bërë të ditur se e kanë kërkuar që të përfaqësohen me një zëvendëskryeministër.

Nga LDK’ja është bërë e ditur, ani pse një gjë e tillë mbetet të finalizohet sot gjatë ditës, se në pozitën e zëvendëskryeministres do ta propozojnë Hykmete Bajramin, që momentalisht mban postin e Ministres në Detyrë të Arsimit.

Ky dikaster me marrëveshjen e re, pritet që t’i shkojë Aleancës për Ardhmërinë e Kosovës.

Edhe AAK’ja, si partia e dytë më e madhe në këtë koalicion, pritet që të përfaqësohet në qeveri edhe nga një zëvendëskryeministër.

Këshilli Drejtues i kësaj partie, ka propozuar Besnik Tahirin në pozitën e zëvendëskryeministrit, derisa, ata marrin edhe udhëheqjen e katër ministrive.

Nisma Socialdemokrate, në krye me Fatmir Limajn është bërë e ditur se do të marrë dy ministri, derisa, kjo parti për zëvendëskryeministër do të ketë vetë Limajn.

Lidhja Demokratike e Kosovës tashmë ka konfirmuar se do të bashkëpunojnë me Listën Serbe e se dhe ata do të jenë pjesë e koalicionit.

Shefi i deputetëve të LDK’së, Arben Gashi ka deklaruar dje se përveç ministrive, Lista Serbe do të jetë e përfaqësuar edhe nga një zëvendëskryeministër.

Partia që udhëhiqet nga Behgjet Pacolli, e që në Kuvend përfaqësohet me dy deputet në rast se vendos të bëhet pjesë e qeverisë, do të mund të marrë postin e zëvendëskryeministrit.

Vetë Pacollit, merr vesh Gazeta iu është premtuar ky post, ani pse fillimisht është diskutuar se i njëjti mund të marrë postin e Ministrit të Punëve të Jashtme.

Partitë politike kanë bërë me dije se sot pasdite mund të nënshkruajnë koalicionin. Pas nënshkrimit, LDK’ja ka deklaruar se do të dërgojnë zyrtarisht emrin e Avdullah Hotit si mandatar, te presidenti./GazetaExpress/