Pak para se të shkarkohej nga posti i presidentit të Federatës Braziliane të Futbollit nga gjykatat braziliane, Ednaldo Rodrigues dha një intervistë për “UOL Esporte”, ku zbuloi detajet e marrëveshjes me Carlo Ancelottin dhe Real Madridin për drejtimin e përfaqësueses braziliane.
Rodrigues shpjegoi se deri në finalizimin e marrëveshjes, procesi kishte qenë i ngadaltë dhe i ngarkuar me diskutime. “Fillimisht nuk fola drejtpërdrejt me trajnerin. E respektoj institucionin dhe duhej ta nisja nga Real Madridi. Nuk kishte asgjë konkrete, gjithçka ishte në ndërtim. E zgjodhëm për karrierën e tij si lojtar dhe si trajner, për mënyrën si sillet me lojtarët, për autoritetin e tij pa qenë autoritar,” përfundoi ai.
Marrëveshja e re ku Ancelotti do të drejtojë Brazilin është një hap i rëndësishëm për Federatën, duke pasur parasysh që synimi kryesor i tij është të fitojë titullin e Kampionatit Botëror me Brazilin. “Kontrata është deri në 2026. Nëse të dyja palët bien dakord për rinovimin, atëherë do të ndodhë. Qëllimi i tij është të bëhet kampion bote me Brazilin,” tha Rodrigues.
Në intervistë, ai rikujtoi mbështetjen që ka marrë nga lojtarët dhe personeli i ekipit, duke thënë: “Kam folur me lojtarë të kombëtares dhe me të tjerë që kanë punuar me të në të kaluarën. Asnjëri nuk më la dyshime. Të gjithë thanë të njëjtën gjë: Është një zgjedhje fantastike, por e vështirë për t’u realizuar. Njerëzit mendonin se ishte e pamundur.”
Stafi teknik që do të mbështesë Ancelottin gjithashtu është planifikuar me kujdes. “Do të ketë një ndihmës, një përgatitës atletik, një analist performance dhe një trajner për goditjet standarde, gjithsej katër, me mundësi për një tjetër. Do të përdorim gjithashtu edhe strukturën tonë teknike,” sqaroi Rodrigues.
Një element interesant në lidhje me këtë marrëveshje është mundësia që Kaka, legjenda e futbollit brazilian, të bashkohet me stafin e Ancelottit. “Nëse ai e dëshiron Kaka në staf dhe është për të mirën e projektit, CBF do ta mbështesë,” tha ai.
Një nga përparësitë e Ancelottit është dëshira e tij për të jetuar dhe punuar në Brazil, duke shprehur interes për të njohur lojtarët e rinj në kampionatin brazilian. “Carlo më tha: Dua të jetoj në Brazil dhe të shikoj ndeshjet. Më tha se ka shumë lojtarë që kalojnë pa u vënë re,” shtoi Rodrigues.
Rodrigues e përshkruan Ancelottin si një njeri të sjellshëm dhe me një perceptim të thellë për futbollin. “Perceptimi im është për një person të sjellshëm, por me ritmin e tij,” tha ai. “Ndërsa ndonjëherë është shumë i matur dhe diskret, ai gjithashtu është i gëzuar dhe i dashur. E njeh futbollin dhe është shumë i apasionuar pas futbollit brazilian.”
Njoftimi për bashkëpunimin e Ancelottit do të zyrtarizohej më herët, por siç ndodh shpesh, informatat kishin rrjedhur më herët. “Ajo që ndodhi të hënën ishte ajo që ndodh gjithmonë. Pati rrjedhje informacioni dhe as CBF, as trajneri nuk donin ta mohonin më,” përfundoi ai.
Që Ancelotti të jetë trajneri i parë i huaj për Brazilin është një fakt që tregon hapjen e Federatës ndaj ndryshimeve. “Nuk kam paragjykime. Ashtu si kombet e tjera mirëpresin lojtarët dhe trajnerët tanë, ashtu mund të bëjmë edhe ne. Kemi fituar pesë Kupa Bote me trajnerë brazilianë dhe kemi humbur gjithashtu me brazilianë. E kuptuam që ai ishte emri më i mirë, pavarësisht kombësisë,” përfundoi Rodrigues.