E njohur për qëndrimin e saj të drejtpërdrejtë dhe mendimet pa filtra si opinioniste në edicionin e katërt të “Big Brother VIP”, Neda Balluku ka vendosur së fundmi të ndajë me publikun edhe një pjesë më intime të jetës së saj personale.
E ftuar në emisionin “Live From Tirana” me gazetarin Ronaldo Sharka, Neda ka rrëfyer një episod interesant dhe mjaft njerëzor nga marrëdhënia me bashkëshortin e saj, me të cilin ka 15 vite që ndan jetën.
E pyetur nga moderatori nëse e ka diskutuar ndonjëherë me partnerin temën e ndjeshme të tradhtisë, Neda u shpreh se në një moment e kishte marrë guximin ta pyeste hapur dhe pa dorashka:
“E kam pyetur njëherë, shumë sinqerisht. I thashë: dua të të pyes dhe të siguroj që nuk do të ketë asnjë pasojë. Vetëm dua të di, çfarë ka ndodhur në jetën tënde ku unë nuk kam qenë pjesë. Jemi 15 vite bashkë.”
Përgjigja që mori nga bashkëshorti i saj, sipas Nedas, ka qenë mjaft e zgjuar dhe njëkohësisht reflektuese për mënyrën si funksionon shpesh mendja njerëzore:
“Më tha: ‘Edhe sikur të të them jo, që nuk ka ndodhur, ti prapë nuk do të më besosh, sepse do që të them po, që ka ndodhur.’”
Sa i përket mënyrës se si e ka pritur këtë përgjigje dhe raportit të saj me besimin në çift, Neda u shpreh se ka zgjedhur gjithmonë të jetë e lirë dhe e hapur, duke mos ushqyer dyshime apo paranoja të kota:
“Unë në çift jam shumë liberale. Besoj atë që më thua. Nuk i hyj telefonit, nuk kontrolloj, nuk bëj kërkime. Nëse më thua ‘jam mirë’, unë e besoj. Nuk kuptoj pse duhet të më thuash diçka që nuk është e vërtetë.”
Ajo shtoi gjithashtu se nuk e sheh kuptimin e skenave apo sjelljeve teatrale në marrëdhënie, duke theksuar se për të, sinqeriteti dhe thjeshtësia janë themeli i një lidhjeje të shëndetshme:
“Nuk di të bëj skena, nuk jam skemaxhie. E them atë që kam, atë që ndiej, sepse mendoj se kështu jetohet më lehtë – duke ia bërë jetën më të thjeshtë njëri-tjetrit, jo më të vështirë.”
Ky rrëfim i sinqertë i Neda Ballukut ka prekur shumë ndjekës dhe dëshmon se, përtej rolit të opinionistes që shpesh duhet të jetë kritike dhe e drejtpërdrejtë, ajo mbetet një grua që beson fuqishëm tek komunikimi i hapur dhe tek forca e besimit reciprok në një lidhje të gjatë.
