Ambasadori i Suedisë në Kosovë, Jonas Westerlund, ka theksuar se formimi i qeverisë aktuale në Kosovë paraqet një sfidë jo vetëm për vendin, por edhe për shumë vende të tjera evropiane.
Westerlund, në një intervistë dhënë për Ekonomia Online, shpjegoi se situata që po përjeton Kosova nuk është jashtëzakonshme dhe se është një fenomen që ndodh edhe në shtete të tjera. Ai u shpreh se është e natyrshme që procese të tilla të kërkojnë kohë dhe negociata të gjata.
“Ka shumë vende në Evropë, veçanërisht në shumicën e vendeve të Evropës Perëndimore, që janë përballur me situata të ngjashme. Shumë herë është e zakonshme që të duhen disa muaj për të formuar një qeveri. Ky është procesi i politikës, dhe siç e dimë, ndonjëherë kërkon fleksibilitet dhe bashkëpunim mes partive,” tha ai.
Ambasadori kishte besim se partitë politike në Kosovë do të arrijnë një marrëveshje dhe se, si në të kaluarën, një qeveri do të formohet në përfundim të këtij procesi. “Uroj që të gjitha partitë politike të tregojnë gatishmëri për të negociuar dhe për të arritur një marrëveshje. Besoj se në fund do të arrijmë të shohim një qeveri të formuar, ashtu siç ka ndodhur gjithmonë,” shtoi Westerlund.
Ndërsa fliste për të ardhmen e Kosovës në Bashkimin Evropian, ai theksoi rëndësinë e anëtarësimit dhe përfitimeve që ai do të sjellë për zhvillimin ekonomik të vendit. Ambasadori e përshkroi këtë proces si një mundësi të artë për Kosovën dhe Ballkanin Perëndimor, duke theksuar se ai do të hapte dyert për investime dhe bashkëpunim më të ngushtë me vendet evropiane.
“Ndryshe nga Suedia, ju keni një vendndodhje shumë të favorshme gjeopolitike. Mendoj se Ballkani Perëndimor ka një të ardhme të ndritur dhe ky është një shans i shkëlqyer për të rritur zhvillimin ekonomik dhe për të përmirësuar standardet e jetesës,” tha ai. Në këtë kontekst, Westerlund theksoi se Kosova duhet të jetë e gatshme të bëjë disa kompromise për të kaluar në këtë fazë të rëndësishme integrimi.
Ai gjithashtu nënvizoi se procesi i anëtarësimit në BE është një hap që kërkon angazhim e punë të madhe, por që gjithë ky përpjekje do të rezultojë në një të ardhme më të mirë për qytetarët e Kosovës. “Duke u anëtarësuar në BE, do të hapni mundësi të reja për rritje dhe prosperitet, duke promovuar tregtinë dhe investimet,” tha ambasadori.
Me një mesazh optimist për të gjithë qytetarët, ai shprehu besimin se Kosova do t’i përballojë këto sfida dhe do të arrijë në majat e saj, siç e meritojnë qytetarët e saj. “E ardhmja është në duar të juaja; besoni në potencialin e vendit dhe punoni së bashku për ta realizuar atë,” përfundoi Westerlund.
