Kapiteni i Interit, Lautaro Martinez, së fundmi dha një intervistë për mikrofonët e DAZN ku ndau ndjesitë e tij para Botërorit të Klubeve, një ngjarje që do të mbahet në SHBA nga 13 qershori deri më 13 korrik të këtij viti.
Martinez nënvizoi emocionin që ndjen përpara kësaj ngjarjeje të madhe, duke shprehur entuziazmin se si do të jetë hera e parë për këtë garë: “Është shumë emocionuese të luash në një Botëror si ky. Do të jetë shumë bukur, diçka vërtet speciale, pasi është hera e parë që luhet ky turne. Jam i lumtur, i kënaqur dhe i emocionuar për atë që do të vijë. Ajo që e bën këtë kompeticion edhe më emocionues është fakti që do të ketë skuadra nga të gjitha kontinentet, nga pjesë të ndryshme të botës.”
Një aspekt i veçantë që ai theksoi është roli i tifozëve, të cilët do të sjellin një gamë të gjerë kulturash në stadium. “Besoj se tifozët do të kenë një rol të rëndësishëm, pasi do të ketë shumë kultura të ndryshme, mënyra të ndryshme për t’u afruar me futbollin dhe për t’i mbështetur skuadrat. Do të jetë shumë bukur. Më pëlqen kur ka shumë njerëz. Sa më e vështirë të jetë, aq më shumë motivohesh, kjo është një gjë e rëndësishme.”
Martinez gjithashtu shprehu ambiciet e skuadrës së tij nën drejtimin e trajnerit Inzaghi. Ai nënvizoi nevojën për të dhënë maksimumin për skuadrën dhe se gjithë ekipit i duhet të punojë së bashku: “Shpresojmë që gjithçka të shkojë mirë për ne, duhet të argëtohemi dhe të japim maksimumin për Interin. Kam folur gjithmonë me babain tim, i cili më thotë: një lider nuk bëhet, por lind i tillë.”
Ai nënvizoi rëndësinë e grupit mbi individin: “Duhet t’i kemi të gjithë në dispozicion, grupi është më i rëndësishëm se individi. E rëndësishme është që lideri gjithmonë të ketë një fjalë pozitive, një sjellje shembullore, natyrisht, dhe që shokët e ekipit ta ndjekin. Interi ka një histori shumë të madhe, është një klub i madh, ndaj duhet të synojmë gjithmonë sa më lart të jetë e mundur.”
Martinez është i vetëdijshëm se rruga nuk do të jetë gjithmonë e lehtë. “E dimë që mund të ketë momente të vështira, ka kundërshtarë që duhet t’i kalojmë. Disa herë do të kemi pengesa, por ajo që ka rëndësi është të bëjmë më të mirën për Interin dhe ta çojmë atë sa më përpara në çdo kompeticion ku luan.”
Gjithashtu, ai diskutoi se çfarë përfaqëson Interi për të si lojtar. Ai ndan pasionin e tij për klubin, duke thënë: “Interi identifikohet shumë me pasionin. Për mua, kjo është fjala që e përfaqëson më së miri Interin: pasioni. Çdo lojtar, në çdo pozicion, pasioni është fjala e parë që të vjen në mendje. Për fanellën, për klubin, për këtë stemë.”
Martinez përfundoi duke thënë se tifozët e Interit e tregojnë pasionin e tyre çdo fundjavë në Itali, dhe është i bindur se do të ishte një ditë e paharrueshme gjatë turneut në SHBA. “Tifozët na e tregojnë këtë çdo fundjavë në Itali, besoj se do ta tregojnë edhe në SHBA.”