Nuk ekziston nivel i sigurt i konsumimit të salsiçeve, ashtu si edhe të mishit të përpunuar në përgjithësi, sipas studimeve
Edhe sasitë e vogla të mishit të përpunuar – vetëm një salsiçe në ditë, apo pijet e ëmbëlsuara – një kënaçe pije të gazuar, rrisin rrezikun për sëmundje serioze, përfshirë kancerin, diabetin tip 2 dhe sëmundjet e zemrës.
Në një studim të ri, botuar në revistën “Nature Medicine”, studiuesit analizuan të dhëna nga mbi 60 studime të mëparshme që shqyrtonin si mishi i përpunuar, pijet e ëmbëlsuara dhe acidet yndyrore trans në ushqim ndikojnë në rrezikun e zhvillimit të sëmundjeve të ndryshme.
Pas përfundimit të analizës, studiuesit arritën në përfundimin se konsumimi i rregullt, edhe në sasi të vogla, i mishit të përpunuar, pijeve të ëmbëlsuara dhe yndyrnave trans lidhet me rrezik më të lartë të zhvillimit të:
▪ diabetit, tip 2,
▪ sëmundjes ishemike të zemrës dhe,
▪ kancerit kolorektal (kanceri i zorrës së trashë dhe i rektumit).
Është tashmë mirë i njohur fakti që ushqimi është shkaktar dhe trajtim për kancerin e zorrës së trashë, dhe studimet tregojnë se njerëzit që konsumojnë shumë mish të kuq dhe të përpunuar dhe pak fibra bimore kanë një rrezik më të madh për të zhvilluar kancer kolorektal, transmeton Telegrafi.
Një hot-dog në ditë rrit rrezikun për diabet dhe kancer të zorrës së trashë
Sipas studimit të ri, personat që hanin vetëm një hot-dog në ditë kishin 11 për qind më shumë rrezik për diabet tip 2 dhe 7 për qind më shumë rrezik për kancer kolorektal, krahasuar me ata që nuk konsumonin mish të përpunuar.
“Mishi i përpunuar përfshin produkte si sallami dhe proshuta që zakonisht përmbajnë konservues të shtuar gjatë procesit të konservimit ose tymosjes.
Në analizën tonë, marrja ditore deri në 57 gramë – sa një hot-dog, ishte lidhur me të paktën 11 për qind rritje të rrezikut për diabet tip 2 dhe 7 për qind rritje të rrezikut për kancer kolorektal krahasuar me ata që nuk konsumonin”, thotë Dr. Demewoz Haile, autor kryesor i studimit dhe studiues në Institutin për Matje dhe Vlerësim Shëndetësor në Seattle.
“Acidet yndyrore trans të prodhuara industrialisht gjithashtu treguan se rrisin rreziqet shëndetësore.
Në këtë analizë, u fokusuam në yndyrnat trans që gjenden zakonisht në ushqimet e përpunuara dhe produkte si krofna, biskota, ëmbëlsira, ushqim i skuqur dhe çipsa”, shpjegon Dr. Haile.
Konsumimi i rregullt i kësaj ushqimi, edhe në sasi të vogla, lidhet me të paktën 3 për qind rritje të rrezikut për sëmundje ishemike të zemrës.
Në mënyrë të ngjashme, konsumimi i pijeve të ëmbëlsuara, si pijet e gazuara, lidhet me pasoja të dëmshme për shëndetin.
Studimi tregon se konsumimi i rreth 350 mililitrave (gjysma e një kënaçeje standarde) pije të gazuara në ditë lidhet me një rritje prej 8 për qind të rrezikut për diabet tip 2 dhe 2 për qind më shumë rrezik për sëmundje ishemike të zemrës.
Nuk ka nivel të sigurt të konsumimit të mishit të përpunuar
Personat që konsumojnë rregullisht këtë ushqim duhet të jenë të vetëdijshëm për rritjen e rrezikut për sëmundje kronike të lidhura me konsumimin e tij, edhe në sasi të moderuara.
Është vërtetuar që rreziku rritet me nivele më të larta konsumimi dhe për mishin e përpunuar të dhënat tregojnë se nuk ka nivel të sigurt të konsumimit.
“Një nga përfundimet më të rëndësishme të këtij studimi është lidhja relative e rrezikut midis zhvillimit të diabetit tip 2 dhe kancerit kolorektal edhe me sasitë e vogla të mishit të përpunuar, që tregon se asnjë sasi reale e mishit të përpunuar nuk konsiderohet e sigurt”, tha Hayli Bishoff, dietologe e regjistruar.
Si lidhen ushqimi, diabeti dhe kanceri i zorrës së trashë?
Ekziston një lidhje midis diabetit dhe rritjes së rrezikut për kancerin e zorrës së trashë.
Studimet kanë treguar se personat me diabet tip 2 kanë një rrezik të shtuar për kancer kolorektal.
Konkretisht, tek meshkujt me diabet tip 2, rreziku për kancer të zorrës së trashë është rritur rreth 24 për qind, dhe në disa studime edhe deri në 36 për qind.
Gjithashtu, mbipesha, që shpesh shoqërohet me diabetin, është faktor rreziku për kancerin e zorrës së trashë.
Për më tepër, mbipesha rrit rrezikun për 13 lloje kanceresh, përfshirë edhe atë të zorrës së trashë.
Kanceri i zorrës së trashë është një nga llojet më të zakonshme dhe më të rrezikshme të kancerit në nivel global, është i treti më i zakonshëm pas kancerit të gjirit dhe mushkërive.
Të dhënat e fundit që tregojnë rritje të rasteve të këtij kanceri tek personat nën moshën 50 vjeç janë veçanërisht shqetësuese.
Si ndikon ushqimi në zhvillimin e kancerit të zorrës së trashë?
Ekspertët mendojnë se një nga faktorët kryesorë që lidhet me rritjen e kancerit të zorrës së trashë është konsumimi i tepërt i ushqimit ultra të përpunuar.
Ushqimi ultra i përpunuar përmban sasi të larta sheqeri, yndyre dhe karbohidrate, ndërsa është i varfër në fibra.
Kjo situatë favorizon zhvillimin e sëmundjeve kronike, përfshirë kancerin e zorrës së trashë.
Shkaqet e kancerit të zorrës së trashë mund të jenë të ndryshme, por shkaktari më i zakonshëm është ushqimi, pra ushqimi i shpejtë dhe i konservuar.
Shumë njerëz fillojnë më herët të përdorin ushqime të konservuara, nuk ushqehen më si dikur gjyshet tona, me ushqim të freskët çdo ditë.
Ritmi i jetës është i tillë që shumë ushqehen në mënyrë të pashëndetshme.
Shikoni fëmijët tanë se çfarë hanë kur shkojnë në shkollë apo në gjimnaz.
Ushqehen në furra buke, hanë ëmbëlsira dhe gjëra të tjera që përgatiten shpejt.
Të gjitha këto ushqime përmbajnë konservues që shërbejnë për t’i mbajtur të freskëta më gjatë, ndërsa vetë konservuesit janë kancerogjenë.
A duhet të shmanget plotësisht mishi i përpunuar?
Sipas rezultateve të studimit të fundit, ekspertët shpjeguan se edhe pse rezultatet tregojnë lidhje të forta dhe konsistente, fokusi duhet të jetë në zakonet e balancuara dhe reale ushqimore, jo në eliminimin e plotë të mishit të përpunuar, pijeve me sheqer dhe yndyrnave trans të prodhuara industrialisht.
“Gjetjet tona përputhen me rekomandimet e njohura gjerësisht, përfshirë ato të Organizatës Botërore të Shëndetësisë dhe Qendrave Amerikane për Kontrollin dhe Parandalimin e Sëmundjeve (CDC): të shmangni ose të ulni konsumimin e mishit të përpunuar, pijeve të ëmbëlsuara dhe yndyrnave artificiale trans në nivelin më të ulët të mundshëm,” tha Dr. Haile.
Gjithashtu, zëvendësimet e shëndetshme mund të jenë një opsion më i mirë sesa eliminimi i rreptë i disa ushqimeve të caktuara.
“Unë sugjeroj kalimin në gjalpë natyral kikiriku ose tortilje bazuar në ushqime integrale, për shembull, që nuk përmbajnë vajra të hidrogjenizuar.
Në vend të pijeve të gazuara, ekzistojnë shumë alternativa më të shëndetshme që kanë më pak se 3–5 gramë sheqer shtesë dhe përsëri ofrojnë një shije freskuese.
Gjithashtu, në vend që të pjekni hot-dog dhe mish të përpunuar, është më mirë të përgatisni shkopinj me perime dhe proteina të ulëta yndyre apo bimore, si tofu”, theksoi dietologia Bishoff.
Ne ju inkurajojmë të ndani mendimin tuaj mbi këtë temë. Disakutime të shëndetshme janë të rëndësishme për të rritur ndërgjegjësimin rreth ushqimit dhe shëndetit.