Pas dështimit për të sjellë Paraticin si drejtor të ri sportiv, në shtëpinë e Milanit ka nisur sërish kërkimi për një tjetër person në këtë rol. Presidenti Scaroni ka pasur një sqarim të rëndësishëm për tifozët, duke iu përgjigjur kritikave që po i bëhen Gerry Cardinale.
“Lexoj disa emra që nuk dalin nga ne, më lind dyshimi se shumë duan të vetë-kandidohen. Askush nuk ka marrë aq shumë lojtarë sa ne në merkaton e fundit, tani duam të forcohemi edhe në drejtim,” tha Scaroni, duke theksuar rëndësinë e strategjisë së klubit për të trajtuar këtë periudhë të vështirë.
Mesazhi për tifozët është i qartë: Milani dëshiron të rikthehet sa më shpejt aty ku i takon, pas një sezoni të paktën zhgënjyes si në Serie A, ashtu edhe në Champions. “Nuk mund të jemi të kënaqur, edhe pse ka diçka pozitive, pasi kemi fituar një trofe duke mposhtur dy skuadra të rëndësishme. Jemi ende në garë për Kupën e Italisë,” shtoi ai.
Scaroni e përmendi angazhimin maksimal që klubit do t’i ofrohet sezonin që vjen dhe theksoi se puna për këtë është tashmë në vijim. Në lidhje me marrëdhënien mes Zlatan Ibrahimoviç dhe Furlanit, ai tha: “I shoh tek punojnë në ‘Casa Milan’ dhe shkojnë për mrekulli bashkë. Rolet e secilit janë të qarta: Zlatan është pjesë e menaxhimit të ‘RedBird’ dhe është ‘i huazuar’ te Milani. Natyrisht, ai mbetet në projekt.”
Diskutimi mbi Gerry Cardinale ishte i pashmangshëm, sidomos pas kundërshtimeve nga tifozët e organizuar. “Nuk është i demoralizuar, por më i vendosur se kurrë për të fituar,” vazhdoi Scaroni. Ai e vlerësoi angazhimin e Cardinale për klubin, duke theksuar se ai i kushton Milanit shumë orë të ditës së tij.
‘RedBird’ tashmë e ka çuar klubin në rekorde të ardhurash, të cilat janë më shumë se dyfishuar në 4 vitet e fundit, duke kaluar nga 192 në 457 milionë euro, burime të reinvestuara në klub. “Me aftësitë e tij, ai ka qenë shumë i dobishëm për projektin e stadiumit. Disa kontestime ndaj dikujt që ka investuar 1.2 miliardë euro për të blerë klubin nuk janë mënyra më e mirë për të na mbështetur,” theksoi Scaroni.
Një tjetër pikë e rëndësishme që ai përmendi ishte stadiumi: “Jam optimist, nuk është më vetëm projekti i Interit dhe Milanit, por edhe i administratës komunale. Ne dhe Interi po ecim të përputhur, sepse kemi nevoja të ngjashme.” Në këtë kontekst, Scaroni u shpreh se stadiumi që është në projekt do të ofrojë një ambient të sigurt dhe të aksesueshëm për të gjithë, duke në një farë mënyre të mbrojë tifozët nga ndikimet kriminale.
Përfundimisht, Scaroni i bëri thirrje tifozëve për të qënë mbështetës dhe gjithashtu për të njohur punën e palodhur të Cardinale dhe ekipit të tij, pasi vetëm me bashkëpunim dhe besim të ndërsjellë, Milani mund të rikthehet aty ku i takon. “Rezultatet në fushë janë prioriteti absolut,” përfundoi ai.