Më shumë se 370 mijë biseda nga Grok janë shfaqur në rezultatet e kërkimit të Googleit pa dijeninë apo lejen e përdoruesve, kur ata kanë përdorur butonin për ndarjen e bisedës që ofron Grok, ka raportuar revista “Forbes”.
Ky fenomen ka ngritur shqetësime të mëdha për privatësinë, duke bërë që shumë përdorues të pyesin veten: A janë bisedat e mia të sigurta? Një URL unike, e krijuar nëpërmjet atij butoni, nuk e ka sinjalizuar faqen si diçka që Google duhet ta injorojë, duke e bërë atë publikisht të dukshme me shumë pak përpjekje.
Çështjet që dalin nga këto biseda përfshijnë fjalëkalime, informacione shëndetësore personale dhe madje edhe drama dashurie. Në disa raste, tema më problematike që lidhen me vepra penale janë bërë gjithashtu të qasshme publikisht, duke rritur frikën për keqpërdorimin e informacionit të ndjeshëm.
Transkriptet e bisedave me Grok janë teknikisht anonime, por nëse përmbajnë identifikues, njerëzit mund të kuptojnë kush qëndron pas tyre. Kjo është një rrezik i madh, pasi ndryshe nga screenshot-et apo mesazhet private, këto linke nuk kanë afat skadimi apo kontroll qasjeje – sapo të aktivizohen, mbesin gjithmonë të tillë.
Për t’u mbrojtur, përdoruesit duhet të ndalojnë së përdoruri funksionin “ndarje”, përveç nëse janë plotësisht të qetë me faktin që biseda e tyre mund të bëhet publike. Kjo është një masë e thjeshtë, por shumë e rëndësishme për ruajtjen e privatësisë.
Nëse tashmë e keni ndarë një bisedë dhe e pendoheni, mund të përpiqeni ta gjeni sërish linkun dhe të kërkoni heqjen e tij duke përdorur veglën e Googlet për heqjen e përmbajtjes. Megjithatë, ky proces është i gjatë dhe nuk ka garanci që linku do të zhduket shpejt, duke e bërë situatën edhe më të komplikuar.
Po ashtu, nëse po bisedoni me Grok përmes platformës X, duhet të rregulloni cilësimet tuaja të privatësisë. Çaktivizimi i opsionit që lejon postimet tuaja të përdoren për trajnimin e modeleve mund të ofrojë një mbrojtje më të madhe, megjithatë kjo nuk është një zgjidhje e plotë.
Kjo situatë tregon se ngutja për të nxjerrë produktet me AI në treg ka bërë që shumë masa mbrojtëse për privatësinë të jenë më të paqarta se çka mund të mendoni. Përdoruesit duhet të jenë të vetëdijshëm dhe të marrin masa për të mbrojtur informacionin e tyre personal.