“Familja më thotë të ndalem, por unë vazhdoj të bëj gjëra të mira për klubin dhe kombëtaren time. Ruaj të njëjtin pasion si dikur. E di që nuk do të kem edhe shumë vite për të luajtur futboll, ndaj dua t’i shijoj në maksimum ato që më kanë mbetur”.
Këto janë fjalët e Cristiano Ronaldos, një legjendë e futbollit dhe futbollisti i parë miliarder në histori, i cili së fundmi u nderua me trofeun “Prestige” nga kombëtarja e Portugalisë për kontributin e tij të jashtëzakonshëm gjatë karrierës. Ky vlerësim vjen pas 22 vitesh angazhimi me fanellën kuqejeshile.
Ronaldo, i njohur për pasionin e tij të pakufishëm, shprehet se është krenar për përkushtimin e tij ndaj kombit. “Sonte janë bërë 22 vite që jam në kombëtare. Besoj se kjo flet vetë për pasionin që kam për ta veshur këtë fanellë, për të fituar trofe dhe luajtur për vendin tim”, tha ai.
Me sfida të rëndësishme përpara, Ronaldo do të udhëheqë ekipin si kapiten në ndeshjen e së shtunës kundër Irlandës, e më pas ndaj Hungarisë, një ndeshje vendimtare për kualifikimin në Botërorin 2026. “E them shpesh; po të mundja, do të luaja vetëm për kombëtaren. Është maja e karrierës së çdo futbollisti”, theksoi ai.
Ronaldo gjithashtu ndau mendimet e tij për të ardhmen. “Dua të vazhdoj të luaj edhe për disa vite të tjera, jo shumë…, të jem i sinqertë. Ende po bëj gjëra të mira, po ndihmoj klubin dhe kombëtaren. Pse të mos luaj, atëherë?”, pyeti ai, duke theksuar se ndjenjë e tij për futbollin është e fortë si kurrë më parë.
“Jam i sigurt se kur të pensionohem nga futbolli, do të largohem i plotësuar sepse dhashë gjithçka”, shprehet Ronaldo, duke reflektuar mbi karrierën e tij të gjatë dhe të suksesshme. Ai është i vetëdijshëm për kohën e kufizuar që ka përpara dhe dëshiron ta shfrytëzojë në maksimum.
“Nuk bëhet fjalë për plane afatgjata. Thjesht shijoje momentin, fokusohu aty. E di që nuk më kanë mbetur shumë vite për të luajtur, por kohën e pakët që kam ende dua ta shfrytëzoj në maksimum, ta shijoj çdo çast”, theksoi ai, duke nënvizuar rëndësinë e momentit në karrierën e tij.
Me një qëllim të qartë për të fituar dy ndeshjet e ardhshme dhe për t’u kualifikuar në Botëror, Ronaldo shprehet optimist: “Çfarë do të ndodhë në finalet e Botërorit… do ta shohim”. Ai përfundon me një filozofi të thjeshtë: “Mbajeni mend filozofinë time: thjesht jetoj ditë pas dite. E shijoj çdo ndeshje dhe çdo stërvitje, po ashtu çdo garë ku marr pjesë”.
