Bryan Johnson, një sipërmarrës amerikan i njohur për përkushtimin e tij ekstrem ndaj luftës kundër plakjes, ka zbuluar se vuan nga gastriti autoimun, një sëmundje kronike që shkakton sulmin e sistemit imunitar ndaj qelizave të stomakut.
Me një investim rreth 2 milionë dollarë në vit për programin e tij të jetëgjatësisë, 48-vjeçari e bëri të ditur diagnozën e tij përmes një postimi në rrjetet sociale, duke thënë: “Stomaku im po ha veten”.
Kjo deklaratë ka ngjallur shqetësim dhe interes të madh në publik.
Pas një serie të gjerë analizash, përfshirë teste gjaku, endoskopi dhe biopsi, Johnson zbuloi se kishte pasur nivele të ulëta të ferritinës për më shumë se një dekadë, pa një shpjegim të qartë për shkakun e kësaj gjendjeje.
Eksaminimet e fundit zbuluan se gastriti autoimun ishte shkaku i këtyre problemeve shëndetësore.
Kjo sëmundje dëmton shtresën mbrojtëse të stomakut dhe mund të ndikojë në përthithjen e vitaminës B12, hekurit dhe lëndëve të tjera ushqyese të nevojshme për organizmin.
Aktualisht, nuk ka një kurë përfundimtare për gastritin autoimun, por trajtimi përqendrohet në menaxhimin e simptomave dhe korrigjimin e mungesave ushqyese.
Monitorimi i vazhdueshëm i gjendjes së pacientit është gjithashtu thelbësor për të parandaluar komplikacione të tjera shëndetësore.
Ekspertët e shëndetit paralajmërojnë se kjo sëmundje mund të rrisë rrezikun për komplikacione të tjera të stomakut, duke e bërë të domosdoshme një kujdes të veçantë për ata që preken nga ajo.
Ndërsa përballet me këtë sfidë shëndetësore, Johnson ka shprehur vendosmërinë e tij për të vazhduar misionin e tij për të ngadalësuar procesin e plakjes.
Ai ka theksuar se do të vazhdojë të dokumentojë përpjekjet e tij për të kuptuar trupin e njeriut dhe për të eksploruar mënyra të reja për të përmirësuar shëndetin dhe jetëgjatësinë.
Si një nga figurat më të njohura të lëvizjes për jetëgjatësinë, Johnson ka investuar miliona dollarë në analiza mjekësore, dieta të kontrolluara dhe procedura të ndryshme, me qëllim që të ruajë një trup sa më të ri dhe të shëndetshëm.
Një nga sekretesh për flokë, lëkurë dhe thonj më të shëndetshëm mund të jetë në pjatën tuaj: ja 8 ushqime që bëjnë diferencën!