Fotot e paqarta dhe të pikselizuara të publikuara nga Michael Olise në Instagram kanë shkaktuar një stuhi në rrjetet sociale, duke grumbulluar mbi 100 mijë komente dhe duke nxitur teori të ndryshme. Shumë njerëz besuan se pas këtyre imazheve qëndronte Florence Pernet, një fotografe franceze që, sipas thashethemeve, ishte lënë jashtë Botërorit nga FIFA dhe kishte vendosur të hakmerrej duke fotografuar Olise nga ekrani i televizorit. Megjithatë, e vërteta është shumë më ndryshe.
Florence Pernet, e cila u përmend si autorja e këtyre fotografive, e mohoi këtë histori me forcë. Ajo tha: “Kam parë shumë informacione të rreme. Nuk jam fotografja e Olise. E kam thënë që në fillim, fotografi i tij është Lukas Korschan.” Pernet gjithashtu shpjegoi se nuk kishte kërkuar kurrë akreditim për të qenë pjesë e Botërorit.
Fotografi i vërtetë i këtyre imazheve është Lukas Korschan, një fotograf dhe drejtor kreativ gjerman, i cili ka shoqëruar Olise gjatë gjithë turneut dhe ka krijuar identitetin vizual të rrjeteve të tij sociale. Korschan është frymëzuar nga legjenda e fotografisë Harry Gruyaert, i njohur për mënyrën e tij të veçantë të kapjes së momenteve sportive nga ekrani i televizorit që nga viti 1972.
Ndërkohë, Pernet kishte realizuar një projekt të pavarur, duke përdorur gjithashtu fotografi të marra nga televizori. Ngjashmëria estetike mes dy projekteve ka bërë që interneti t’i bashkonte gabimisht, duke krijuar një nga historitë më të virale dhe më të keqinterpretuara të Kupës së Botës 2026.
