Reagimi i këngëtarit Drilon Jahdahuti ndaj situatës së krijuar nga Jona Krasniqi, banore e Big Brother VIP Kosova 5, ka sjellë në pah një histori të dhimbshme dhe personale.
Me anë të një postimi në Instagram, Driloni ka ndarë një përvojë të tijën nga e kaluara, duke zbuluar se ka qenë viktimë e bullizmit rreth gjashtë apo shtatë vjet më parë.
Ai ka përmendur se gjatë asaj periudhe, ishte përballur me komente negative dhe fyese për këngën e tij “Reja e nanës tem”, e cila, sipas tij, ka ndikuar në mbylljen e llogarisë së tij në Instagram nga disa individë, përfshirë Jona dhe disa vajza të tjera.
“Le që u kallxu bullizuese sot live në TV, po qikjo qike me qat grup s’ka lon gjo pa than për kangën tem”, ka shkruar ai, duke theksuar se kënga e tij tani ka arritur afro nëntë milionë klikime.
Driloni shpreson që Jona të reflektojë për veprimet e saj dhe të kuptojë pasojat që sjellin fjalët e saj.
Përveç këtij reagimi, ai ka njoftuar gjithashtu për një projekt të ri muzikor. Sot, ai dhe Beslira kanë publikuar bashkëpunimin e tyre më të ri, të titulluar “Dy xheloza”.
Kështu, Drilon Jahdahuti rikthehet në vëmendje si me rrëfimin e tij për përvojat e së kaluarës, ashtu edhe me projektin e tij më të fundit muzikor, duke treguar se sfidat e jetës nuk e kanë ndalur atë në rrugën e tij artistike.
