Prishtina do të bëhet skena e një ngjarjeje të paharrueshme më 27 qershor 2026, kur legjenda e rock-ut, Bryan Adams, do të performojë për herë të parë në këtë qytet.
Pas një koncerti të suksesshëm në Tiranë vitin e kaluar, Adams ka vendosur të sjellë formatin e tij të veçantë akustik, “The Bare Bones”, në Kosovë. Ky turne është i njohur për intimitetin dhe afërsinë që krijon me publikun, duke e bërë çdo shfaqje një përvojë unike.
Në një intervistë ekskluzive për Prive by Liberta Spahiu, ai ndau mendimet e tij për Kosovën dhe arsyet pse Prishtina është përfshirë në itinerarin e tij. Adams shprehu interesin për vendet antike romake dhe theksoi se dëshiron të vijë herët për të eksploruar si turist.
Kur u pyet për përshtypjet e tij për Kosovën, ai u përgjigj: “Sigurisht. Dua Lipa dhe Rita Ora kanë qenë ambasadore të shkëlqyera për ju. Jam i interesuar të shoh disa nga vendet antike romake, kështu që do të vij herët për të qenë turist.”
Adams shpjegoi se vendimi për të sjellë turneun “Bare Bones” në Prishtinë i ofron më shumë fleksibilitet. “Është një mënyrë tjetër pune, sigurisht, por e dua sepse më lejon të jem shumë fleksibël se ku mund të luaj. Disa ndërtesa në botë nuk janë të përshtatshme për një bend rock, por janë perfekte për shfaqjen Bare Bones.”
Ky format akustik e paraqet muzikën ashtu siç është shkruar fillimisht – e zhveshur, me zë dhe kitarë. Gary Breit do t’i bashkohet në piano për gjysmën e koncertit, duke krijuar një lidhje më të drejtpërdrejtë me publikun.
Adams gjithashtu ndau mendimet e tij për brezat e ndryshëm që këndojnë së bashku këngët e tij, duke e konsideruar këtë si një dëshmi të fuqisë së muzikës së tij. “Po, e shoh këtë gjithmonë. Mendoj se është një dëshmi për vetë këngët që kanë mundur të durojnë provën e kohës.”
Mesazhi i tij për fansat kosovarë është i ngrohtë dhe i thjeshtë: “Ejani dhe kënaquni me një natë jashtë, këndoni nëse doni, nuk do t’ju gjykoj!”
Me ardhjen e Bryan Adams në Prishtinë, Kosova do të ketë një tjetër moment të rëndësishëm në kalendarin e saj kulturor. Turneu “Bare Bones” premton një natë intime, ku muzika e një prej artistëve më të njohur të rock-ut do të dëgjohet për herë të parë në kryeqytet, duke rikthyer origjinalitetin e këngëve të tij.
Biletat për koncertin e Bryan Adams i gjeni duke klikuar https://vivere.al/evente/ulese/index.php?idev=386&lang=al&refer=