Pas një incidenti të paprecedent që shkaktoi kolapsin e gjysmës së internetit, Cloudflare ka dalë në skenë për të sqaruar arsyet e kësaj ndërprerjeje masive. Çfarë ndodhi realisht dhe si ndikon kjo në përdoruesit dhe bizneset anëtare të këtij shërbimi?
Një numër i madh përdoruesish përjetuan vështirësi të mëdha kur tentonin të hynin në platforma si X, ChatGPT dhe Canva. Mesazhi që shfaqej ishte: “Internal server error on Cloudflare’s network, please try again in a few minutës”. Kjo situatë shkaktoi panik dhe shqetësim në mesin e përdoruesve dhe kompanive që varen nga këto shërbime.
Dane Knecht, një nga udhëheqësit e Cloudflare, e pranoi përgjegjësinë për këtë incident në një reagim të tij në rrjetet sociale. Ai theksoi se ndodhi një dështim i rëndësishëm që ndihmoi në rënien e rrjetit, duke prekur një sasi të madhe trafiku që varet nga shërbimi i tyre.
“S’do t’i zbus fjalët: sot dështuam ndaj klientëve tanë dhe ndaj internetit në tërësi. Një problem në rrjetin e Cloudflare ndikoi një sasi të madhe trafiku që varet prej nesh,” tha ai, duke kërkuar falje për të gjitha faqat dhe organizatat e prekura.
Megjithatë, ai theksoi se kjo nuk ishte një sulm, por një defekt i fshehtë në një shërbim që mbështet sistemin e mbrojtjes ndaj bot-eve. Ky defekt filloi të shkaktonte rënie pas një ndryshimi rutinë konfigurimi, duke çuar në një rënie të gjerë të rrjetit.
Knecht e pranoi se ndikimi dhe koha e reagimit nuk ishin të pranueshme. Ai njoftoi se kompania është duke punuar për të parandaluar përsëritjen e një situate të tillë në të ardhmen, duke theksuar se besimi i klientëve është prioriteti kryesor i Cloudflare.
Pak minuta më parë, ai njoftoi se problemet me rrjetin e Cloudflare janë zgjidhur rreth orës 15:30, duke rikthyer trafikun si prioritet të parë. Megjithatë, incidenti kërkoi punë shtesë për të rikthyer plotësisht edhe ‘control plane’ – panelin e kontrollit dhe API-të që klientët përdorin për konfigurime.
Cloudflare paralajmëroi se brenda pak orësh do të publikojë një shpjegim të plotë se çfarë shkoi keq dhe çfarë hapash do të ndërmarrë për të shmangur përsëritjen e një situate të tillë. Ky incident ka ndikuar në shumë faqe, përfshirë Klankosova.tv, duke treguar se sa të ndjeshëm janë shërbimet online ndaj problemeve teknike.