Pas një humbjeje tragjike, Egzon Sahiti ndan ndjenjat e tij më të thella për mikun e tij të ndjerë, Laurent Krasniqi. Një mesazh i thjeshtë nga një ndjekës e ka bërë atë të reflektojë mbi dhimbjen e tij dhe boshllëkun që ka lënë pas humbja e Laurentit.
Egzoni, i njohur për aktivitetin e tij në rrjetet sociale, ka zgjedhur të tërhiqet nga publikimi i përmbajtjeve pas vdekjes së mikut të tij. Megjithatë, ai ka thyer heshtjen përmes një përgjigjeje të sinqertë ndaj një ndjekësi që e inkurajoi të rikthehej në jetën e përditshme.
“Vllaqko, dhimbja është shumë e rëndë për krejt neve, po kena nevojë si popull për buzëqeshjen e juve”, i shkruante ndjekësi, duke shprehur dëshirën për ta parë Egzonin përsëri të lumtur.
Përgjigjja e Egzonit ishte e shkurtër, por e mbushur me emocione. Ai shprehu se dhimbja që ndjen është e madhe, duke theksuar se me humbjen e Laurentit, kanë mbetur në gjysmë shumë ëndrra dhe plane që ata kishin ndarë së bashku.
“Dhimbja është e madhe, sepse bashkë me të mbetën në gjysmë edhe shumë ëndrra, plane e momente që duhej t’i jetonim bashkë”, ka shkruar ai, duke treguar se sa thellë e ka prekur kjo humbje.
Laurenti, i cili u nda nga jeta në fillim të shtatorit, kishte një miqësi të ngushtë me Egzonin, e cila ishte e njohur për publikun. Dyshja shpesh shfaqeshin së bashku dhe ndanin momente të bukura, por tani Egzoni ndan edhe ndjenjat e tij për ato që nuk arritën t’i realizonin.
Kjo është hera e parë që Egzoni flet kaq hapur për boshllëkun që ka lënë humbja e mikut të tij, duke e bërë këtë moment edhe më prekës për ata që e njohin historinë e tyre. /Prive By LS
