Gjatë një interviste të fundit në kanalin e YouTube ‘xBuyer’, Pep Guardiola ka ndarë me publikun një anekdotë personale që e bën atë të reflektojë mbi marrëdhënien e tij me legjendën e Manchester City, Sergio ‘El Kun’ Agüero. Ai shpesh flet për Agüeron, duke e përshkruar atë si një nga lojtarët më të përulur dhe të talentuar që ka pasur nderin ta trajnojë.
Guardiola e filloi diskutimin duke treguar për momentin e vështirë kur i komunikoi Agüeros se klubi nuk do t’ia rinovonte kontratën. Ai shpjegoi se si kjo situatë e krijoi një tension të dukshëm, por gjithashtu nxori në pah karakterin e fortë të sulmuesit. “I thashë Agüeros, dhe ishte shumë e vështirë për mua. Por atë ditë në stërvitje, ai realizoi 200 gola në ndeshjet e vogla,” kujton Guardiola.
“Më dukej se ai qëndronte atje me një fytyrë që thoshte: Ja ku do t’ia tregoj këtij, do të shënoj 200 gola!” Këto fjalë përshkruanin dëshirën e Agüeros për të dëshmuar aftësitë e tij, dhe Guardiola vuri në dukje se ky moment ishte simbolik për natyrën konkurruese të futbollit.
Pas kësaj, Guardiola përmendi se Agüero përfundoi duke shënuar dy gola në ndeshjen e tij të fundit me klubin, duke e mbyllur karrierën atje në një mënyrë spektakolare. “Për mua ishte një privilegj ta trajnoja Agüeron. Ai kishte një talent unik,” tha Guardiola me admirim.
Pep gjithashtu ndau mendimet e tij mbi vështirësitë që gjeneratat e reja përballen sot në futboll. “Të rinjtë e sotëm janë më të mbrojtur. Ne e kishim shumë të vështirë. Dilje në ‘Camp Nou’, 50 gazetarë të pranishëm në konferencë për shtyp dhe po ashtu kritika të ndryshme,” u shpreh Guardiola.
Ai theksoi se përballja me kritikën ishte një pjesë e rëndësishme e mësimit të rinjve me të cilët ai kishte punuar. “Sidoqoftë, ne kishim veteranë që na mbronin. Merrnim edhe ndonjë shpullë, që është mënyra më e mirë për të mësuar. Kam pasur mjeshtrin Johan Cruyff, i cili në fillim na ndihmonte shumë, por kur filloje të spikasje, të jepte edhe goditje të forta,” theksoi ai.
Guardiola e përfundoi bisedën duke komentuar stilin e lojës së lojtarëve të rinj të Barcelonës. “Tani sheh lojtarët e Barcelonës dhe duket sikur luajnë në oborrin e shkollës. Luajnë gjysmëfinale Champions-i ose në ‘Santiago Bernabéu’ kundër Real Madridit me 17-19 vjeçarë dhe duken sikur janë në pushimin e shkollës,” përfundoi Guardiola, duke nënkuptuar se rritja dhe ish-ndihma nga përvojat e mëparshme janë shumë të rëndësishme për brezat e rinj.