Heidi Baci ka ndarë me ne një rrëfim të thellë për transformimin e saj nga një aspiratë për të studiuar farmacinë në një karrierë të suksesshme në botën e televizionit, duke na treguar se si fama e ka gjetur papritur.
Si moderatorja e emisionit “Për’puthen” dhe ish-finalistja e Big Brother VIP Albania 3, Baci ishte e ftuar e parë në emisionin e ri të teknologjisë Tech Talk, i drejtuar nga Kristi Gongo dhe Kushtrim Shala.
Gjatë bisedës, ajo shprehu dëshirën e saj të thellë për të ndjekur studimet në fushën e farmaceutikës, një ëndërr që, siç tha ajo, u ndërpre për shkak të rrethanave të papritura.
“Unë kisha shumë dëshirë të merresha me farmaceutikë, por jeta më çoi në rrugë të tjera,” theksoi Baci, duke shpjeguar se pandemia COVID-19 e detyroi atë të ndryshonte planet e saj.
Pas përfundimit të tre viteve të para të studimeve, Baci u përball me sfida të mëdha, pasi situata në Itali ndryshoi ndjeshëm për shkak të shpërthimit të pandemisë.
“Ndodhi problematika globale e COVID-it. Unë sapo kisha përfunduar trevjeçarin e parë dhe nuk arrita të vazhdoja specializimin që dëshiroja për farmaceutikë,” shpjegoi ajo, duke theksuar se shumë nga aktivitetet laboratorike ishin të lidhura me testimet për COVID-19.
Heidi Baci gjithashtu ndau mendimet e saj mbi marrëdhënien me ndjekësit e saj në rrjetet sociale, duke theksuar se ata janë një pjesë e rëndësishme e jetës dhe karrierës së saj.
“Janë shumë të lidhur me mua. E vërteta është se nuk e di ku do të isha pa ta. Ata kanë qenë forca ime më e madhe dhe unë e shijoj shumë këtë raport që kemi,” tha ajo me sinqeritet.
Ajo pranoi se fama sjell gjithashtu kritika, por theksoi se mbështetja e audiencës është gjithmonë më e rëndësishme. “E kam vendosur veten në një pozicion ku flitet për mua, ndaj nuk kam problem edhe kur kritikohem,” përfundoi ajo.
Rrëfimi i saj në Tech Talk tregon një anë të re të figurës së saj publike, duke ilustruar se rruga drejt suksesit dhe famës ka qenë krejt ndryshe nga ajo që kishte planifikuar fillimisht.