Web Analytics

Ka shkuar ne 61 numri i të helmuarve në Malishevë, një gjashtëvjeçar në gjendje më të rëndë

Botuar nga: InfoKosova

Drejtori i Qendrës Kryesore të Mjekësisë Familjare në Malishevë, Afrim Krasniqi, ka bërë të ditur se numri i të helmuarve me ushqim në Malishevë, ka shkuar në 61.

Këta persona dyshohet se janë helmuar pasi kanë konsumuar ushqim në një lokal të Malishevës, që shërben ushqime të shpejta.

“Deri tani në këto momente kur po flasim, janë evidentuar 61 raste të cilët kanë kërkuar ndihmë mjekësore në Qendrën Kryesore të Mjekësisë Familjare”, ka thënë Krasniqi, për Klan Kosova.

Ai ka bërë të ditur se një fëmijë i moshës gjashtëvjeçare është në gjendje më të rëndë.

“Gjendja për momentin është më e rëndë për momentin është e një fëmijë të moshës gjashtëvjeçare. Komplikimet e tij janë për momentin janë dridhjet, ethe, temperaturë dhe ka një çrregullim të sistemit nervor për momentin”, u shpreh tutje ai.

Ai ka thënë se ushqimi që kanë konsumuar të helmuarit kryesisht ka qenë doner.

Ndryshe, Zëdhënësi i Policisë së Kosovës për rajonin e Gjakovës, Toger Sheremet Elezaj në një prononcim për Telegrafin ka thënë se fillimisht personat që kishin konsumuar ushqim kishin kërkuar ndihmë në QKMF-në e Malishevës ku janë konstatuar dyshimet e forta se bëhet fjalë për helmim.

“Rreth orës 16:50 kemi pranuar informatë se disa persona kishin kërkuar ndihmë mjekësore në QKMF-Malishevë, nga raportet fillestare mjekësore, dyshoheshin për helmim si pasojë e ngrënjes së ushqimit në një lokal ku shërbehen ushqime të shpejta”.

Ai ka thënë se Policia ka dalë në vendin e ngjarjes, po ashtu edhe inspektorët komunal si dhe ata të Agjensisë së Ushqimit dhe Veterinarisë.

Ndërkaq, drejtori për shëndetësi në Komunën e Malishevës, Hajdin Berisha,  ka thënë se 10 prej të helmuarve kanë simptoma të rënda dhe për trajtim janë dërguar në QKUK-Prishtinë.

“10 persona pas simptomave të rënda të helmimit janë dërguar për trajtim në Klinikën Infektive në QKUK. Gjendja e disave prej tyre është e rëndë, por mjekja na ka thënë se të gjithë janë jashtë rrezikut për jetë”, deklaroi Berisha.

RRJETET SOCIALE

1,162,113FansaPëlqeje
27,988NdjekësitNdjek
989NdjekësitNdjek
406AbonentëAbonohu

Të FUNDIT