Presidentja e Kosovës, Vjosa Osmani, më 16.02.2025, ka pranuar letër urimi nga presidenti i Shteteve të Bashkuara të Amerikës, Donald Trump, me rastin e 17-vjetorit të shpalljes së Pavarësisë së Kosovës.
Vitin e kaluar, ajo kishte pranuar urime për nder të Ditës së Pavarësisë edhe nga presidenti i atëhershëm i SHBA-së, Joe Biden. Edhe pse të dy liderët amerikanë shprehin mbështetje për Kosovën, mesazhet e tyre kanë dallime të theksuara që reflektjnë stilin dhe prioritetet e tyre politike.
Mesazhi i Biden dhe Trump-it, përveç se në formë, dallon edhe në përmbajtje. Biden, për shembull, kishte theksuar rëndësinë e një Kosove multietnike, duke e parë këtë si një shenjë e stabilitetit dhe harmonisë në rajon. Ai kishte shprehur mbështetje për dialogun e ndërmjetësuar nga BE që synon një marrëveshje gjithëpërfshirëse me Serbinë, e cila ishte prioritet kryesor i administratës së tij.
Ndryshe nga Biden, Trump në urimin e tij theksoi mbështetje për përkushtimin e Kosovës për ndërtimin e një shoqërie demokratike, pa përmendur nevojën për një Kosovë multietnike. Në vend të kësaj, ai u fokusua në lidhjet ekonomike dhe mundësitë për investime, duke theksuar se “Shtetet e Bashkuara mbështesin plotësisht Kosovën”.
Ky dallim reflekon qasjen e ndryshme të dy presidentëve për çështjen e dialogut mes Kosovës dhe Serbisë. Biden kishte inkurajuar lidershipin e Kosovës të përmbushte obligimet e saj, duke nënvizuar rëndësinë e zbatimit të marrëveshjeve të kaluara. Ndërsa Trump, përkundrazi, nuk e përmendi dialogun apo ndonjë detyrim konkret në urimin e tij, diçka që mund të interpretohet si një dallim të qartë në qasje.
Në kontekstin e lidhjeve të forta mes dy vendeve, Trump kishte shprehur dëshirën për të ndihmuar Kosovën në ndërtimin e një rajoni më të begatë dhe më të sigurt. Kjo tregon përpjekjet e tij për të fokusuar politikën e jashtme amerikane në bashkëpunimin ekonomik, në vend të theksimit të zgjidhjeve diplomatike për problemet e rajonit.
Një tjetër veçori e rëndësishme e mesazheve të dy presidentëve është mbështetja e tyre për integrimin euroatlantik të Kosovës. Të dy liderët janë shprehur pro përpjekjeve të Kosovës për t’u integruar më tej në institucionet evropiane dhe euro-atlantike, duke nënvizuar rëndësinë e stabilitetit dhe paqes në rajon.
Gjithashtu, mesazhet e Trump dhe Biden theksuan mbështetje të fuqishme për Kosovën në lidhje me situatën e saj me Ukrainën, sidomos përballë agresionit të Rusisë. Kjo njëherë mban të freskët qëllimin e përbashkët të SHBA-së dhe Kosovës për të mbështetur lirinë dhe demokracinë në të gjithë rajonin. Presidentja Osmani, përmes këtyre urimeve dhe mesazheve, është duke forcuar pozitën e Kosovës në arenën ndërkombëtare.
Letra e plotë e Trump më 2025:
E nderuara zonja Presidente,
Në emër të popullit të Shteteve të Bashkuara, ju lutem pranoni urimet e mia më të përzemërta për ju dhe popullin kosovar ndërsa festoni Ditën e Pavarësisë. Rrugëtimi i Kosovës si komb sovran është shënuar me qëndrueshmëri dhe vendosmëri.
Shtetet e Bashkuara mbështesin plotësisht Kosovën dhe përkushtimin e saj për ndërtimin e një shoqërie demokratike ku të gjithë qytetarët e saj mund të jetojnë dhe të lulëzojnë së bashku. Lidhjet midis njerëzve tanë janë të forta dhe ne presim me padurim t’i zgjerojmë ato lidhje, duke përfshirë rritjen e mundësive për investime, për të sjellë prosperitet më të madh për të dy kombet tona. Shtetet e Bashkuara do të vazhdojnë të punojnë me Kosovën, pasi ajo forcon institucionet demokratike dhe promovon rritjen ekonomike përmes një mjedisi të qëndrueshëm dhe të drejtë biznesi.
Shtetet e Bashkuara mezi presin të ndërtojnë një marrëdhënie më produktive me qeverinë e Kosovës në vitin e ardhshëm. Ndërsa punojmë me Kosovën dhe fqinjët e saj për të ndërtuar një rajon më të begatë dhe më të sigurt, është e rëndësishme që Kosova të integrohet më tej me komunitetin euroatlantik. Mbështetja e palëkundur e Kosovës për Ukrainën përballë agresionit rus vlerësohet shumë.
Përvjetori i pavarësisë së Kosovës është një kohë për të nderuar arritjet e kaluara, si dhe për të parë drejt një të ardhmeje më të ndritshme dhe lidhjeve më të thella ndërmjet kombeve tona.
Dërgoj urimet e mia më të mira për popullin e Kosovës në këtë ditë feste.
Letra e plotë e Biden më 2024:
E nderuara zonja Presidente:
Në emër të popullit të Shteteve të Bashkuara, ju dërgoj urimet tona më të mira për ju dhe popullin e Kosovës teksa nderoni ditën tuaj të pavarësisë më 17 shkurt.
Kosova dhe SHBA-ja ndajnë një miqësi të qëndrueshme dhe partneritet – të përforcuar nga vizioni i përbashkët për një rajon më paqësor, të sigurt dhe të suksesshëm. SHBA-ja fuqishëm e mbështet një Kosovë multietnike dhe integrimin e saj në institucionet evropiane dhe euro-atlantike. Ne po ashtu vazhdojmë t’i mbështesim përpjekjet e dialogut të lehtësuara nga BE-ja për të arritur një marrëveshje normalizimi gjithëpërfshirëse me Serbinë – një hap i rëndësishëm përpara njohjes reciproke në fund të procesit. Bashkë me vendet e rajonit dhe botës, SHBA-ja e inkurajon lidershipin e Kosovës që t’i përmbushë obligimet e tij, përfshirë të gjitha marrëveshjet e kaluara të arritura përmes këtij procesi.
Në vitin e ardhshëm, pres të vazhdojmë të punojmë së bashku për ndërtimin e rritjes ekonomike gjithëpërfshirëse, forcimin e institucioneve demokratike dhe avancimin e shtetit të së drejtës. Gjithashtu, pres me padurim bashkëpunimin tonë të vazhdueshëm për sigurinë dhe përpjekjet e përbashkëta për të avancuar reformat e nevojshme për të arritur përfundimisht qëllimin e Kosovës për integrimin në BE. Dhe së bashku, ne do të vazhdojmë të ngrihemi për lirinë, përfshirë duke qëndruar së bashku me Ukrainën përballë agresionit brutal të Rusisë.