Projekti ambicioz i vilës së Taylor Swift dhe Travis Kelce në Ohio ka shkaktuar një debat të fortë mes banorëve të zonës. Ndërsa disa e shohin si një mundësi për zhvillim, të tjerë shprehin shqetësime të thella për ndikimin që mund të ketë ky projekt në natyrën përreth.
Plani për të vendosur shkurre të larta rreth pronës luksoze ka ngjallur reagime të forta. Banorët frikësohen se këto ndërhyrje do të dëmtojnë habitatin e kafshëve dhe do të pengojnë lirinë e tyre për të jetuar në këtë zonë të bukur.
Një mbledhje e Bordit Lokal të Rishikimit Arkitekturor u mbajt në qendrën komunitare të Bratenahl, ku morën pjesë rreth 35 persona. Diskutimi u përqendrua në detajet e projektit, përfshirë lartësinë e shkurreve, të cilat pritet të arrijnë deri në 3 metra.
Lucy Weller, një banore e zonës, shprehu shqetësimin e saj për nevojat e specieve vendase. Ajo theksoi se projekti nuk merr parasysh rëndësinë e ofrimit të kushteve të përshtatshme për kafshët e egra.
“Kjo është një mundësi e shkëlqyer që njerëzit me para të investojnë për ta sjellë këtë shtëpi në nivelin që meriton. Do të ishte gjithashtu rast i mirë që kjo palë të kthehej dhe të mësonte më tepër për speciet vendase dhe për projektimin e hapësirave që marrin parasysh nevojat e kafshëve të zonës”, tha Weller, duke e theksuar nevojën për një qasje më të ndjeshme ndaj natyrës.
Ajo kritikoi gjithashtu hapësirat e mbuluara me bar, duke theksuar se ato nuk ofrojnë asgjë për mbrojtjen e jetës së egër. “Kafshëve nuk u duhen lëndina, por ushqim, strehë dhe vende ku të çiftëzohen”, shtoi ajo, duke e bërë të qartë se projekti nuk është në përputhje me nevojat e natyrës.
Chuck Bauernschmidt, një tjetër banor, shprehu shqetësime të ngjashme, duke e quajtur projektin një kërcënim për komunitetin. “Më vjen keq për komunitetin tonë. Kjo nuk do të jetë e hapur. A po veproni në kundërshtim me rregulloret?”, pyeti ai, duke shprehur dyshime për vendimet e Bordit.
Edhe pse Swift dhe Kelce nuk ishin të pranishëm në mbledhje, ata ishin përfaqësuar nga administratori i pronës dhe arkitekti, të cilët mbrojtën projektin. Vasiliki Diamantis, një banore që mbështeti çiftin, e përshkroi si një privilegj që ata e zgjodhën Bratenahl për të jetuar.
“Duhet ta konsiderojmë privilegj që këta njerëz, të cilët kanë mundësi financiare, e zgjodhën këtë vend për banesën e tyre. Në vend që të debatojmë për peizazhin dhe privatësinë, le të bashkohemi si komunitet dhe ta shohim si një mundësi”, tha Diamantis, duke e theksuar rëndësinë e mirëpritjes.
Megjithatë, një pjesëmarrës tjetër e quajti debatin “budallallëk” dhe parashikoi se prona do të shitet pas disa vitesh. Kjo shkaktoi protesta dhe vërshëllima nga të pranishmit, duke treguar tensionin e situatës.
Bordi miratoi njëzëri planin e rishikuar, i cili përfshin vendosjen e shkurreve dhe përmirësime të tjera në pronë. Çifti kishte marrë më herët lejen për të ndërtuar një gardh privatësie, por edhe ai ishte kundërshtuar nga disa banorë.
Swift dhe Kelce, të martuar në korrik, blenë këtë pronë luksoze për 5.35 milionë dollarë. Ajo përfshin tetë dhoma gjumi dhe 11 banjo, dhe sipas raportimeve, nuk pritet të shërbejë si vendbanimi kryesor i çiftit, i cili zotëron gjithashtu prona në disa qytete të tjera.