Emri i Endrit Thaçit, djali i ish-presidentit të Kosovës, Hashim Thaçi, ka tërhequr vëmendjen e publikut pas ngjarjeve të fundit në Hagë, duke shënuar një rritje të dukshme në kërkimet online.
Ekspertja e IT-së, Nadia Elbasani, e cila ishte e ftuar në emisionin “Ftesë në 5”, theksoi se interesimi për Endrit Thaçin ka arritur kulmin gjatë ditës së vendimit të Hagës. Kërkimet në Google dhe YouTube për të dhe për djalin e Kadri Veselit janë rritur ndjeshëm.
Elbasani vuri në dukje se ajo që i bëri më shumë përshtypje ishte krahasimi i interesimit për Endrit Thaçin me atë për Partinë Demokratike të Kosovës (PDK). Ajo theksoi se emri i Endrit Thaçit është klikuar më shumë se vetë PDK-ja në Google.
“Kërkimet për Endritin janë më të larta se ato për PDK-në, që tregon një kuriozitet të veçantë të publikut, sidomos të brezave të rinj, për familjarët e figurave kryesore të UÇK-së,” shpjegoi ajo.
Gjatë të njëjtës periudhë, Elbasani vuri re se kishte një rritje të kërkimeve për UÇK-në, me përdorues që kërkonin më shumë informacion rreth historisë dhe zhvillimeve të saj. Kjo tregon se brezi i ri është i interesuar për këto tema.
“Brezi i ri kërkon më shumë nga këta djem. Fakti që ka një fokus edhe në aspektin fizik nuk e largon Endritin nga figura e tij publike,” shtoi ekspertja.
Rritja e kërkimeve online për Endrit Thaçin pas zhvillimeve në Hagë tregon një interes të shtuar të publikut. Megjithatë, Elbasani theksoi se këto të dhëna përfaqësojnë vetëm monitorimin e saj dhe nuk duhet të interpretohen automatikisht si tregues të mbështetjes politike.