Psikologia Antigona Sejdiu ka zbuluar se si qëndrimi i gjatë në ambiente të mbyllura, siç është rasti i “Big Brother”, ndikon në psikologjinë e konkurrentëve pas daljes nga programi.
Ajo thekson se ky proces sjell transformime të thella në mënyrën se si individët ndihen dhe reagojnë ndaj situatave të ndryshme.
Një nga efektet më të dukshme të qëndrimit të gjatë në një hapësirë të mbyllur është rritja e nivelit të stresit psikologjik.
Sejdiu shpjegon se mungesa e privatësisë dhe vëzhgimi i vazhdueshëm e bëjnë të vështirë rregullimin emocional, duke e intensifikuar tensionin dhe emocionet.
“Qëndrimi për 100 ditë në një ambient të tillë krijon një situatë ku çdo konflikt merr përmasa më të mëdha.
Reagimet bëhen më impulsive, dhe ndjenjat intensifikohen, duke e bërë të pamundur shmangien nga tensionet”, thotë ajo.
Kjo situatë ndikon në mënyrën se si individët e perceptojnë realitetin.
Izolimi i gjatë, sipas psikologes, krijon një “mikrobotë” ku konkurrentët fillojnë të ndihen të shkëputur nga bota e jashtme.
Kjo ndikon në mënyrën se si ata ndërveprojnë me njëri-tjetrin, duke i bërë ata të ndihen më të ndjeshëm dhe të ekspozuar ndaj stresit.
“Duke qenë të izoluar, ata krijojnë lidhje të shpejta, por gjithashtu përjetojnë konflikte më të thella.
Normat sociale zhvendosen dhe sjelljet shpesh reflektojnë presionin e ambientit, jo personalitetin e tyre të vërtetë”, shton Sejdiu.
Pas daljes nga programi, shumë konkurrentë përjetojnë një fazë të vështirë tranzicioni.
Kjo përfshin ndjenja zbrazëtie emocionale dhe vështirësi në rikthimin në jetën e përditshme.
Sejdiu thekson se përballja me komentet publike dhe ndryshimet e ritmit kërkon kohë dhe ndihmë profesionale.
Mungesa e kontaktit me familjen dhe miqtë e afërt i privon ata nga burimet e zakonshme të mbështetjes emocionale.
Kjo i bën ata më të ndjeshëm dhe më të lëkundshëm emocionalisht, duke rritur irritimin dhe nostalgjinë për jetën e mëparshme.
“Mbështetja psikologjike është thelbësore në këtë periudhë.
Pas daljes, shumë individë përballen me pasiguri rreth imazhit të tyre dhe kanë vështirësi në rikthimin në dinamikën e përditshme”, përfundon Sejdiu, duke theksuar rëndësinë e ndihmës profesionale për të përballuar këto sfida.
