Protestat e dhunshme që kanë përfshirë qytetet evropiane, përfshirë Francën dhe Shqipërinë, tani kanë shpërthyer edhe në Itali, ku Milano është bërë epiqendra e përleshjeve mes protestuesve dhe forcave të policisë.
Gjatë natës së dytë të trazirave, protestuesit shkatërruan dyqane dhe plaçkitën prona, duke detyruar policinë të ndërhyjë me gaz lotsjellës dhe mjete të tjera për të ruajtur rendin publik.
Kryeministrja italiane, Giorgia Meloni, ka thirrur një takim urgjent për të shqyrtuar situatën e sigurisë në vend.
Trazirat filluan gjatë një proteste të organizuar kundër rritjes së kostos së jetesës dhe shpejt u shndërruan në dhunë të hapur, me protestues të maskuar që goditën automjetet e policisë dhe shkatërruan pronë publike.
Një supermarket pranë katedrales së Milanos u plaçkit, ndërsa incidente të ngjashme u raportuan edhe në qytete të tjera si Bolonja dhe Torino, sipas raportimeve nga media të huaja.
Kryebashkiaku i Milanos, Giuseppe Sala, shprehu shqetësimin e tij për situatën, duke e quajtur këtë një fenomen të ri që lidhet me rrethanat ndërkombëtare.
Meloni dënoi dhunën dhe i quajti protestuesit banditë, duke theksuar se protesta është një e drejtë, por shkatërrimi i pronës publike nuk është i pranueshëm.
Gati 2,400 të arrestuar në Francë
Ndërkohë, në Francë, situata është po aq alarmante, me pothuajse 2,400 të arrestuar dhe rreth 1,000 policë të lënduar gjatë përleshjeve. Pamjet e publikuara tregojnë grabitje të dyqaneve luksoze, duke përfshirë ato të markave të njohura si Louis Vuitton dhe Rolex.
Protestat filluan një muaj më parë për shkak të mungesës së stafit në shkolla, por tani janë shndërruar në një lëvizje më të gjerë kundër rritjes së kostove të jetesës, me rreth gjysmë milioni njerëz që dolën në rrugë gjatë fundjavës.
Presidenti amerikan, Donald Trump, gjithashtu reagoi ndaj situatës në Francë, duke fajësuar emigracionin për trazirat dhe duke kërkuar mbylljen e kufijve.
Protesta të ngjashme u zhvilluan edhe në Portugali, ku qytetarët protestuan kundër qirave të larta dhe pagave të ulëta, duke kërkuar masa për lehtësimin e kostove të jetesës.