Kryeministri Edi Rama ka zhvilluar sot një mbledhje të rëndësishme me Grupin Parlamentar të Partisë Socialiste, ku ka trajtuar investimin në Zvërnec, një projekt që ka shkaktuar shumë reagime.
Rama theksoi se çështja ka marrë përmasa ndërkombëtare në një periudhë të shkurtër, duke vënë në dukje se shumë individë që nuk e njihnin fare zonën, kanë formuar qëndrime të forta për të.
Ai argumentoi se reagimet e shumicës ndaj këtij projekti nuk ishin të bazuara në analiza të thella, por ishin të ndikuara nga emocione dhe perceptime që shkojnë përtej kufijve të Shqipërisë.
“Miliona njerëz që nuk dinë as ku ndodhet Zëvrneci, dinin saktësisht se çfarë duhet të mendonin për Zvërnecin. Kjo ndodhi jo për shkak të studimeve mbi Shqipërinë, por për shkak të simbolikës që lidhej me një zog, i cili u bë simbol i një rezistence anti-kapitaliste. Kështu, u hap një kanal për mllefin ndaj meje, ndaj jush dhe PS-së,” shprehu Rama.
Kreu i qeverisë theksoi se projekti në Zvërnec është shndërruar në një përplasje më të gjerë globale, e cila nuk lidhet drejtpërdrejt me Shqipërinë, por me një luftë ideologjike që ka origjinën jashtë saj.
“Ky është mësimi i parë i kësaj historie. Sot, çdo ngjarje lokale mund të bëhet një përplasje globale, e cila transporton jo vetëm mallra, por edhe zemërime dhe identitete politike dhe fetare. Një projekt zhvillimi në Shqipëri u bë pjesë e një lufte ideologjike që nuk ka lindur këtu,” tha ai.
Rama e përshkroi Shqipërinë si një skenë ku zhvillohen këto ngjarje, duke theksuar se ne nuk jemi protagonistë, por thjesht pjesë e një tregimi më të madh. Kjo është risia e kohës sonë, ku emocionet shpesh mbërrijnë para fakteve.
“Duhet ta kuptojmë këtë histori për atë që vjen më pas. Ky është vetëm fillimi. Është e rëndësishme të distancohemi pak nga politika dhe të studiojmë historinë për të kuptuar më mirë situatën,” përfundoi Rama.