Një ngjarje e veçantë po afron për adhuruesit e muzikës shqiptare, e cila premton të sjellë emocione të forta dhe surpriza të papritura.
Këngëtari dhe aktori i njohur, Bertan Asllani, do të bashkohet me Yll Limanin në një koncert të madh që do të mbahet më 17 korrik në Shkup. Ky rikthim ka shkaktuar një valë entuziazmi mes fansave, të cilët e kanë pritur me padurim rikthimin e tij në skenën shqiptare pas një periudhe të gjatë mungese.
Fillimisht, lajmi për këtë bashkëpunim u përhap në rrjete sociale, por tani është konfirmuar nga burime të besueshme, duke e bërë atë një fakt të pakundërshtueshëm.
Bertan Asllani, i njohur për hite si “Akoma të dua”, e nisi karrierën e tij si një nga artistët më të spikatur të muzikës RnB dhe pop në Shqipëri. Ai ka arritur të zhvendosë suksesin e tij në Turqi, ku ka ndërtuar një karrierë të suksesshme si aktor dhe kompozitor.
Në Turqi, ai ka luajtur në disa prej serialeve më të njohura, si “Gecenin Ucunda” dhe “Yabani”, duke u bërë një emër i njohur në kinematografinë turke. Përveç aktrimit, ai ka kontribuar edhe si kompozitor për disa produksione të mëdha.
Ky koncert në Shkup është pjesë e turit të Yll Limanit, i cili po shënon rekorde të pjesëmarrjes në çdo qytet ku performon. Pas Shkupit, Ylli do të vazhdojë me një tjetër koncert në Kosovë.
Ylli ka njoftuar se datat 24 dhe 25 korrik do t’i kushtohen Prishtinës, ku pritet të ofrojë dy net të paharrueshme për publikun e kryeqytetit.
Rikthimi i Bertanit në Shkup, krah Yllit, do të sjellë një bashkim të dy emrave të dashur për publikun, duke e bërë këtë ngjarje një moment të veçantë në historinë e muzikës shqiptare. /Prive By Liberta Spahiu