Valdet Hoxha, ish-kryeshefi i Inspektoratit Policor të Kosovës, ka theksuar rëndësinë e masave të ndërmarra nga Policia e Kosovës në prag të aktgjykimit të Gjykatës Speciale, duke i cilësuar ato si normale dhe të domosdoshme.
Gjatë një interviste në emisionin “Edicioni Special” në Klan Kosova, Hoxha shprehu shqetësimin se vendimi që pritet të merret në Hagë mund të ketë pasoja të thella, jo vetëm për Kosovën, por edhe për stabilitetin e rajonit dhe më gjerë.
Ai theksoi se përgatitjet e Policisë së Kosovës, së bashku me thirrjet e Ambasadës Amerikane, nuk duhet të interpretohen si alarm, por si masa të nevojshme për të menaxhuar situata të mundshme me tubime të mëdha dhe emocione të qytetarëve.
“Si njohës i këtyre rrethanave dhe në bazë të përvojës sime profesionale, mund të them se këto masa janë shumë praktike, të domosdoshme dhe normale,” theksoi Hoxha.
Ai theksoi se është e rëndësishme që Policia e Kosovës të ketë një plan operacional që garanton sigurinë e të gjithë qytetarëve, pa marrë parasysh përkatësinë e tyre etnike.
“Policia e Kosovës nuk do të falet nëse nuk ka një plan operacional për ta siguruar jetën e gjithë qytetarëve në Republikën e Kosovës, pavarësisht nëse janë shqiptarë, serbë, goranë, egjiptianë etj.,” deklaroi Hoxha.
Hoxha gjithashtu paralajmëroi se, pavarësisht nëse aktgjykimi është lirues apo dënues, priten reagime emocionale nga qytetarët, dhe se zhvillimet mund të shfrytëzohen politikisht nga aktorë të ndryshëm në rajon.
Me këtë kontekst, ai theksoi se është thelbësore që të gjitha palët të jenë të përgatitura për të menaxhuar situatën, duke garantuar një ambient të qetë dhe të sigurt për të gjithë qytetarët.