Kryetari i Lidhjes Demokratike të Kosovës (LDK), Lumir Abdixhiku, ka shprehur shqetësimin e tij për projektbuxhetin e vitit 2027, duke theksuar se Qeveria po i jep më shumë rëndësi ndihmave sociale sesa investimeve që do të mundësonin zhvillimin ekonomik të vendit.
Gjatë diskutimit mbi projektbuxhetin në Kuvendin e Kosovës, Abdixhiku e vuri në dukje se ndihmat financiare janë të nevojshme për qytetarët, por ato nuk mund të zëvendësojnë investimet dhe nuk ofrojnë zgjidhje afatgjata për sfidat ekonomike që përballen familjet kosovare.
Ai theksoi se rritja e çmimeve dhe inflacioni po e rëndojnë gjithnjë e më shumë situatën e familjeve në Kosovë, ndërsa mungesa e investimeve po e pengon përmirësimin e mirëqenies së tyre. Abdixhiku shprehu shqetësimin se ndihmat financiare, pa investime të qëndrueshme, do të krijonin një cikël të vështirë ekonomik.
“Një buxhet që premton paga më të larta dhe ndihma për fëmijë është i mirë, por nëse nuk ka investime, ne do të vazhdojmë të mbesim të fundit në Evropë. Inflacioni i këtij viti tregon se ndihmat e shtetit janë të domosdoshme, por ato vetë janë burimi i problemeve për shumë familje,” tha ai.
Kreu i LDK-së paralajmëroi se mbështetja e vazhdueshme në ndihma financiare, pa investime të mjaftueshme, mund të krijojë një spirale negative, ku rritja e çmimeve do të kërkonte ndihma të reja, duke kontribuar sërish në rritjen e çmimeve.
Abdixhiku kërkoi që Qeveria të fokusohet në investime në sektorët strategjikë, veçanërisht në energji dhe infrastrukturë. Ai theksoi se Kosova ka nevojë për projekte të mëdha zhvillimore që do të zvogëlonin varësinë nga importi i energjisë elektrike.
“Nëse vazhdojmë kështu, do të rriten çmimet dhe do të kemi nevojë për më shumë ndihma. Kjo do të krijojë një cikël të vështirë për ekonominë. Duhet të investojmë në energji dhe infrastrukturë, sepse aktualisht po blejmë energji. Është e papranueshme që ende flasim për asfalt dhe rrugë të papërfunduara,” përfundoi Abdixhiku.
Ndryshe, projektbuxheti për vitin 2027, i prezantuar nga kryeministri Albin Kurti, parasheh shpenzime në vlerë prej 4.27 miliardë eurosh.