Kryeministri i Shqipërisë, Edi Rama, ka komentuar refuzimin e kryeministrit të Kosovës, Albin Kurti, që ta takojë e që ka ardhur si reagim i anulimit të mbledhjes së dy qeverive nga kryeministri shqiptar.
Ai ka thënë se anulimin i mbledhjes së dy qeverive ka ardhur, pasi kishte kërkuar që të takohej me kryeministrin Kurti, por që nuk kishte ardhur deri te ky takim, pasi sipas tij, Kurti nuk kishte gjetur kohë të takohej.
Rama tha se nuk qëndron se mos mbajtja e mbledhjeve të dy qeverive ishte thikë pas shpine për Kosovën.
“Takimi nuk ka ndodhur. Nuk kam fjalë për ta interpretuar. Çfarë thike është që një mbledhje mes dy qeverish për marrëveshje të dakordësuara të mbahet kur ka gjëra të tjera më me rëndësi. Është e kundërta e thikës. Shtrirja e dorës për të qenë së bashku për ta kuptuar më shumë njëri-tjetrin. Nuk mund të bëhet me ato që dëgjojmë nga televizioni. Ideja që anulimi është thikë, qëndrimi i Kosovës është i duhur dhe gjithë bota e ka gabim. Nuk është kështu”, tha ai.
“Ka edhe keqkuptim sikur anulimi i mbledhjes së qeverive ka ardhur si rezultat i masave të BE. Në fakt e kundërta është e vërtetë. Kam kërkuar me insistim nga Albini që të bëjmë një takim të dy bashkë sepse kam dashur t’i përcjell disa shqetësime dhe kam dashur ta lehtësoj pozicionin e Kosovës. Nuk ka qenë i mundur takimi, nuk e di pse. Albini ka qenë shumë i zënë, ka pasë punë të tjera, nuk e di!
“Ideja që anulimi i mbledhjes është se thikë pas shpine, vjen si rezultat i idesë se qëndrimi i Kosovës është i duhur dhe e gjithë bota e ka gabim. Dhe Shqipëria e ka gabim dhe i është bashkuar gjithë botës që ka gabim. Ndërkohë që Qeveria e Kosovës është e vetmja që ka të drejtë. Dhe pa pritur pa kujtuar të gjithë partnerët, aleatët miqtë e Kosovës janë bërë armiq, ose kundërshtarë, Ose janë bërë forca të errëta dhe Kosova është i vetmi fanar ndriçues që ka pllakosur planetin”, tha Rama, në Klan Kosova.
Ai ka thënë se ka provuar që të kishte komunikim me kreun e ekzekutivit kosovar.
“Nuk kam ardhur të shpjegoj, ta interpretoj qëndrimin e Albinit. Gjëja me e rëndësishme sot është që njerëzit të takohen, të flasin, për më tepër kur kanë qëndrime të ndryshme. Duke u takuar mbase e kuptojnë më mirë njëri-tjetrin. Kemi komunikuar, në fakt jam përpjekur të komunikoj, por ka qenë e vështirë”, është shprehur Rama.
Rama ka vazhduar të thotë se këtë turne nëpër Ballkanin Perëndimor është duke u bërë për dy arsye: Mbajtja e Samitit të Procesit të Berlinit dhe Samiti i NATO-s.
“Është e habitshme se si kjo mundësi për vështirësohet në komunikim këtu në Kosovës, ndërkohë që Kosova ka nevojë më shumë se kurrë për të dalë nga kjo situatë”, tha ai./Telegrafi/
Shiko Videon:
