TikTok ka bërë një hap të rëndësishëm në botën e tregtisë elektronike duke prezantuar dy mjete inovative: një asistent blerjesh të mbështetur nga inteligjenca artificiale dhe një sistem pagese me një klikim, që lejon përdoruesit të blejnë direkt nga aplikacioni.
Shërbimi i ri, i njohur si Shopping Assistant, funksionon si një agjent bisedor i mbështetur nga AI. Ai është dizajnuar për të udhëzuar përdoruesit gjatë procesit të kërkimit, krahasimit dhe blerjes së produkteve, duke ofruar një përvojë më të lehtë dhe më të shpejtë.
Kompania thekson se asistenti është në gjendje të kuptojë rrjedhën e bisedës dhe të mbajë mend preferencat dhe nevojat e përdoruesit gjatë ndërveprimit. Kjo do të thotë se çdo bisedë është e personalizuar dhe e fokusuar në atë që përdoruesi kërkon.
Përmes këtij asistenti, përdoruesit mund të marrin informacione në kohë reale mbi produktet, përfshirë madhësitë, gjendjen e stokut dhe detajet e transportit, duke e bërë procesin e blerjes më të informuar dhe të shpejtë.
Produkti mund të blihet direkt nga “For You”
Një tjetër risia e rëndësishme është sistemi i ri i pagesës, i cili kërkon vetëm një klikim për të përfunduar blerjen. Përdoruesit do të kenë mundësi të blejnë artikuj direkt nga marka përkatëse ndërsa shohin videot në For You feed, faqja kryesore e aplikacionit.
Ky proces fillon me shfaqjen e produktit në një video, vazhdon me informacionin e ofruar nga asistenti i AI-së dhe përfundon me pagesën, të gjitha brenda platformës TikTok. Kjo qasje synon të rrisë kontrollin e TikTok mbi ciklin e blerjes.
Nuk do të jetë e nevojshme që përdoruesit të kalojnë në një faqe tjetër për të përfunduar blerjen, pasi TikTok dëshiron që çdo transaksion të realizohet brenda aplikacionit të tij, duke ofruar një përvojë të pandërprerë.
Objektivi është që përdoruesit të mos largohen nga TikTok
Asistenti i ri gjithashtu ka një qëllim më të gjerë strategjik. TikTok duket se po përpiqet t’i mbajë përdoruesit në platformë edhe kur ata kërkojnë informacione për produkte, duke i shmangur mjetet e tjera të inteligjencës artificiale, si ChatGPT.
Nëse informacioni dhe pagesa mund të realizohen në të njëjtin vend ku produkti është zbuluar, TikTok mund të fitojë një rol të rëndësishëm në tregtinë online.
Bashkëpunim me Shopify, Salesforce dhe Stripe
TikTok ka njoftuar se këto funksione të reja po ndërtohen në bashkëpunim me disa nga kompanitë më të njohura në teknologjinë e tregtisë elektronike dhe shërbimet e pagesave, si Salesforce, Shopify, Shoplazza dhe Stripe.
Këto partneritete synojnë të lehtësojnë lidhjen e sistemeve të pagesave dhe katalogëve të produkteve për markat që dëshirojnë të tregtojnë përmes TikTok.
Një zgjerim i modelit TikTok Shop
Ambiciet e TikTok në tregtinë elektronike deri tani janë mbështetur kryesisht te TikTok Shop, i cili u lançua në SHBA në shtator të vitit 2023 dhe ka regjistruar një rritje të shpejtë.
Megjithatë, risitë e fundit tregojnë se kompania nuk ka ndërmend të kufizohet vetëm te TikTok Shop. Plani është që mjetet e blerjes të shtrihen në të gjithë aplikacionin, veçanërisht në “For You feed”, ku përdoruesit kalojnë pjesën më të madhe të kohës.
Kështu, TikTok mund të kalojë nga një platformë ku konsumatorët zbulojnë produkte në një hapësirë ku blerja mund të përfundojë menjëherë.
54 milionë amerikanë kanë blerë pasi kanë parë produkte në TikTok
Zgjerimi i funksioneve të tregtisë vjen në një periudhë kur ndikimi i platformës mbi sjelljen e konsumatorëve po rritet ndjeshëm. Economic Impact Report i TikTok vlerëson se aktiviteti në platformë ka kontribuar në gjenerimin e rreth 81 miliardë dollarëve në PBB për bizneset amerikane.
Rreth 54 milionë amerikanë kanë deklaruar se kanë blerë një produkt pasi e kanë parë më parë në një video të TikTok, duke dëshmuar ndikimin e konsiderueshëm të platformës në mënyrën se si konsumatorët njihen me produkte të reja.
TikTok Shop po zgjeron peshën në treg
Të dhënat nga eMarketer tregojnë se TikTok Shop realizoi rreth 15.8 miliardë dollarë shitje në SHBA gjatë vitit 2025, që përbënte afërsisht 18 për qind të gjithë tregtisë sociale në SHBA.
Me Shopping Assistant dhe pagesën direkte me një klikim, TikTok po synon ta rrisë më tej pjesën e tij në këtë treg të rëndësishëm.
Strategjia e kompanisë është ta shndërrojë zbulimin spontan të një produkti në një blerje të plotë, pa e nxjerrë përdoruesin jashtë aplikacionit. Nëse këto funksione japin rezultatet e pritshme, TikTok mund të bëhet një rival edhe më i fortë, jo vetëm ndaj platformave të tjera sociale, por edhe ndaj marketplace-ve tradicionale dhe shërbimeve të tregtisë elektronike.
