Këngëtarja e njohur shqiptare, Leonora Jakupi, ka ndarë me ndjekësit e saj në Instagram disa imazhe tejet emocionale dhe plot kujtime, duke përkujtuar babanë e saj, Qazim Jakupin, i cili ra dëshmor për lirinë e Kosovës 28 vite më parë.
Me një ndjenjë të thellë dhimbjeje dhe krenarie, Leonora ka përzgjedhur disa fotografi domethënëse që pasqyrojnë lidhjen e saj të veçantë me të atin. Ajo ka shoqëruar këto imazhe me dedikime që flasin për dashurinë e pakufishme dhe kujtimin e tij të përjetshëm.
Në një nga fotografitë e ndara, ajo ka publikuar një imazh bardhezi të prindërve të saj, ku shihen krah njëri-tjetrit në rininë e tyre. Me një mesazh prekës, ajo ka shprehur mallin e saj të pashuar për babanë e saj.
“Sa mall kam për ty, engjëlli im babë”
Një tjetër imazh i fuqishëm është ai i babait të saj me uniformën e Ushtrisë Çlirimtare të Kosovës (UÇK). Kjo fotografi simbolizon sakrificën e tij për liri dhe nderin që ai përfaqëson për familjen dhe vendin.
Leonora ka ndarë një mesazh të thellë për këtë imazh, duke theksuar lidhjen e tyre shpirtërore dhe ndikimin e tij në jetën e saj. Ajo e përshkruan atë si një hero të vërtetë, duke e mbajtur atë të gjallë në kujtimet e saj.
“Ditët e vitet kalojnë e ti vazhdon të mbetesh i freskët në kujtimet e mija.. dora jote akoma përkëdhel flokun tim nga lart! Ti, heroi im, të qoftë i lehtë dheu i Kosovës!”
Për ta përmbyllur këtë përkujtim të ndjerë, Leonora ka publikuar një pamje nga varri i të atit, i cili është i mbuluar me lule të freskëta të bardha. Kjo skenë e bukur simbolizon dashurinë dhe respektin që ajo ndjen për të.
Mbi këtë imazh, ajo ka shkruar:
“Sot 28 vite pa ty, babë, ti mburrja dhe krenaria jonë!”
Edhe pas gati tri dekadash, dhimbja për humbjen e njeriut të shtrenjtë mbetet e pranishme, por ajo gjithmonë tejkalohet nga krenaria e pamatshme për sakrificën e tij sublime. /Prive By Liberta Spahiu
