Çmimi i druve në tregun e Prishtinës ka arritur në nivele alarmante, duke u shfaqur në 65 deri 70 euro për metër kub. Kjo situatë ka shkaktuar shqetësim te qytetarët, të cilët e konsiderojnë këtë çmim të papërballueshëm.
Një shitës druri në kryeqytet, në një intervistë për media, konfirmoi se çmimi i druve ka arritur deri në 70 euro për metër kub, duke theksuar se ka një interes të madh për blerjen e druve. Ai e justifikon këtë rritje të çmimit me mungesën e punëtorëve dhe kostot e larta të punës.
“70 euro për metër kub druri, si ahu ashtu edhe bungu, shiten në të njëjtën çmim. Disa qytetarë ankohen, por disa janë të kënaqur. Mungesa e punëtorëve është një faktor i rëndësishëm, pasi askush nuk pranon të punojë për më pak se 100 euro”, shprehet shitësi.
Një tjetër shitës i druve konfirmon të njëjtën situatë, duke thënë se çmimi është i njëjtë si vitin e kaluar. “Metri i druve është 65-70 euro, dhe kjo është situata aktuale. Disa qytetarë janë të pakënaqur, por ka edhe ata që e pranojnë këtë çmim”, thotë ai.
Marad Dushi, një qytetar, e sheh këtë çmim si të papërballueshëm, duke u bazuar në pagat aktuale. “Mendoj se 70 euro është shumë. Do të ishte më mirë nëse çmimi do të ishte 45 ose 50 euro, por tani është e papërballueshme për ne”, thotë Dushi.
Edhe Enver Ahmeti, një tjetër qytetar, e konsideron çmimin si të lartë. “Deri diku është shtrenjtë për ne. Edhe 60 euro do të ishin të larta, por 70 euro është shumë”, thotë ai.
Shumë qytetarë kanë shprehur shqetësimin e tyre për çmimet e larta dhe kanë kërkuar mbështetje nga institucionet për të zgjidhur këtë problem. Ata shpresojnë se do të ketë masa për të ulur çmimet e druve.
Një informacion i fundit tregon se një ton pelet në treg kushton rreth 380 euro, ndërsa sipas Agjencisë së Statistikave të Kosovës, çmimi mesatar për 1 m³ dru në shtator të vitit 2025 ishte 57,68 euro. Alternativa për ngrohje për disa qytetarë mbetet Termokosi, i cili ka nisur ngrohjen nga 15 tetori.