Bashkëthemeluesi i Microsoft, Bill Gates, ka ngritur alarmin se asnjë qeveri në botë nuk është e përgatitur për sfidat që do të sjellë Inteligjenca Artificiale (AI) në shoqëri.
Në një intervistë të fundit për Reuters, Gates shprehu shqetësimin se qeveritë janë pas zhvillimeve teknologjike dhe se ndikimi i AI në tregun e punës është një çështje që kërkon vëmendje të menjëhershme. Ai theksoi se rreziqet e sulmeve kibernetike dhe varësia nga “shoqëruesit” digjitalë po rriten.
“Asnjë qeveri nuk po merret me këtë në masën që duhet”, theksoi Gates, duke sugjeruar se një qasje më e fortë dhe e koordinuar është e domosdoshme për të përballuar këto sfida.
Megjithatë, ai theksoi se Inteligjenca Artificiale ka potencialin për të sjellë përfitime të mëdha, veçanërisht për vendet në zhvillim, nëse teknologjia përdoret në mënyrë të drejtë dhe të barabartë.
Fondacioni Gates ka njoftuar se do të investojë të paktën 1 miliard dollarë në dy vitet e ardhshme për të zgjeruar aksesin në Inteligjencën Artificiale, me fokus në shëndetësi, arsim dhe bujqësi.
Investimet do të përfshijnë projekte që synojnë krijimin e bazave të të dhënave për të mundësuar përdorimin e modeleve të mëdha gjuhësore në të gjitha gjuhët, duke e bërë teknologjinë më të aksesueshme për të gjithë.
Gates e vlerësoi veçanërisht rolin e AI në shëndetësi, duke përmendur mbështetje për mjekët dhe punonjësit shëndetësorë, si dhe zbulimin e ilaçeve dhe vaksinave të reja.
Megjithatë, ai kërkoi një bashkëpunim më të madh ndërkombëtar për të shmangur rreziqet që lidhen me zhvillimin e AI. Gates e krahasoi këtë situatë me skenarët e filmave, ku një kërcënim i jashtëzakonshëm detyron vendet rivale të bashkohen për të mbrojtur të mirën e përbashkët.