Ekspertët kanë paralajmëruar për kujdes ndaj një pilule vitaminash me sheqer, që po fiton popullaritet mes djemve adoleshentë në rrjetet sociale, për pretendimin e saj se ndihmon në shtimin e gjatësisë.
Suplementet TruHeight, që kushtojnë rreth 40 euro, dhe përmbajnë pothuajse një lugë çaji sheqer në një dozë, promovohen në mijëra video në TikTok si ndihmës për adoleshentët që duan të “rriten më gjatë”.
Në një pretendim të bujshëm, krijuesi i përmbajtjes Aaron Thomas i tha 147,000 ndjekësve të tij se u rrit katër inç (10 cm) vetëm brenda tre muajve pasi filloi të marrë vitaminat TruHeight.
Një tjetër përdorues i TikTok-ut, Omar Natour, i bëri thirrje “mbretërve të shkurtër” që “duhet të bëhen më të gjatë” e të marrin TruHeight, duke e quajtur suplementin “magjik” dhe që “do t’ju ndihmojë të rriteni më gjatë”.
Ndërsa Damon Brown, me 659,000 ndjekës, i renditi këto ëmbëlsira si një nga “katër mënyrat për t’u rritur më gjatë”, së bashku me aktivitetin fizik, ushqimin e shëndetshëm dhe gjumin e mjaftueshëm.
Këto ëmbëlsira përmbajnë kalcium, vitaminë K, vitaminë D dhe bimën aziatike ashwagandha.
Reklamat e markës, e cila, përveç vitaminave për rritje, shet edhe suplemente për gjumë dhe proteina, përfshijnë video me dëshmi nga prindër dhe adoleshentë që pretendojnë se vitaminat i kanë ndihmuar të rriten më gjatë.
Një nga videot në TikTok tregon historinë e një djali të quajtur Liam, i cili thuhet se u rrit nga 152 cm në 162 centimetra katër muajsh falë TruHeight.
Por, duke folur për MailOnline, ekspertët u shfaqën skeptikë ndaj efekteve të pretenduara.
Dietologia dhe përfaqësuesja e Shoqatës Britanike të Dietetikës, Aisling Pigott, paralajmëroi se marketingu është “shumë mashtrues”.
Ajo theksoi se, megjithëse ka dëshmi se suplementimi i vitaminës D mund të mbështesë rritjen e shëndetshme të kockave, kjo nuk do t’ju ndihmojë të rriteni më gjatë sesa “potenciali juaj maksimal”, i cili është “i përcaktuar nga gjenetika jonë”.
Ajo shtoi se me një çmim prej rreth 40 euro për një shishe, është afërsisht gjashtë herë më e shtrenjtë se suplementet e zakonshme të vitaminës D.
“Adoleshentët mund t’u bëjnë presion prindërve të shpenzojnë para për këto vitamina, por është një humbje”, tha ajo.
Gjatësia jonë përcaktohet nga gjenetika jonë.
Një dietë e dobët mund të na ndalojë të rritemi aq sa duhet, por ky suplement nuk do të ndihmojë për ta ndrequr këtë.”
Zonja Pigott theksoi se suplementet ka gjasa të mos jenë të dëmshme – përveç nëse merren në sasi të tepërt.
Sipas NHS, 10 mikrogramë në ditë janë të mjaftueshme për të përfituar nga efektet e forcimit të kockave të vitaminës D, por marrja e më shumë se 100 mikrogramëve në ditë mund të jetë e dëmshme dhe në fakt të dobësojë kockat, të dëmtojë veshkat dhe zemrën.
Ëmbëlsirat TruHeight Growth përmbajnë 20 mikrogramë për çdo dozë prej dy copash – kështu që 10 ëmbëlsira (ose pesë doza të rekomanduara) mund t’ju çojnë mbi kufirin e sigurt.
Kjo nuk është hera e parë që kompania e suplementeve akuzohet për “reklamim mashtrues”.
Marka TruHeight është në pronësi të Vanilla Chip, një kompani që ka qenë e përfshirë në disa procese gjyqësore, përfshirë një të ngritur në prill 2024 që pretendonte se TruHeight kishte bërë “pretendime të rreme dhe mashtruese” për rritjen e fëmijëve.
“Vanilla Chip reklamon se konsumimi i rregullt i produkteve të saj për rritje bëri që fëmijët, të vegjlit dhe adoleshentët të rriten më të lartë sesa do të kishin pa to”, thuhet ndër të tjera në padi.
“Produktet për rritje nuk mund të ofrojnë atë që premtojnë — një fakt që Vanilla Chip e di ose do të duhej ta dinte. Produktet për rritje janë të paaftë të bëjnë që fëmijët të rriten më të lartë sesa do të rriteshin me një dietë të zakonshme”, shton tutje ajo.
Megjithëse videot në internet sugjerojnë se suplemente do t’i ndihmojnë fëmijët të rriten më gjatë, marka është e kujdesshme të mos e deklarojë këtë shprehimisht.
Në vend të kësaj, kompania përdor fraza të tilla si “mbështet rritjen dhe zhvillimin e shëndetshëm” dhe “mbështet rritjen dhe funksionin normal të kockave”.
Marka e suplementeve ka gjithashtu një seksion për provat klinike në faqen e saj të internetit, që thotë se TruHeight “testoi inovacionet tona për rritje”.
Ajo thotë se pas një provë klinike pilote prej gjashtë muajsh, fëmijët që morën TruHeight çdo ditë kishin një “rritje të rëndësishme statistike të kolagjenit X” krahasuar me ata që nuk morën suplementin.
Sipas TruHeight, kolagjeni X është një “biomarkues kritik i lidhur ngushtë me aktivitetin në pllakat e rritjes së kockave që zhvillohen.”
Zonja Pigott paralajmëroi se kompania e suplementeve është “duke ecur në një vijë shumë të hollë”.
“Ata po ndjekin rregullat, por po lejojnë që disa informacion të pasaktë të depërtojë në mënyrën se si po paraqitet”, tha ajo.
“TruHeight është projektuar për të mbështetur rritjen dhe zhvillimin e shëndetshëm të kockave me përdorim të vazhdueshëm”, tha një përfaqësues i TruHeight për MailOnline:
“Rezultatet mund të ndryshojnë nga një person në tjetrin. Ne rekomandojmë marrjen e dozës të sugjeruar të suplementeve TruHeight çdo ditë, së bashku me një dietë të shëndetshme dhe ushtrime të rregullta. Është e rëndësishme të theksohet se TruHeight nuk është një zgjidhje magjike, por një mënyrë natyrale dhe të sigurt për të mbështetur rritjen dhe zhvillimin e shëndetshëm.”
Shiko Videon:
@truheight_vitamins Since the beginning, everything we’ve done has been rooted in purpose and passion. We’re determined to make a better future for kids who need nutritional support. Watch and get to know the founders and mission behind TruHeight. Get to know the founders and mission behind TruHeight. #TruHeight #ReachHigher #fyp