Kryeministri i Kosovës, Albin Kurti, priti në takim shefin e Misionit të Bashkimit Evropian për Sundim të Ligjit, EULEX, Giovanni Pietro Barbano, me të cilin bisedoi sigurinë, sundimin e ligjit dhe drejtësinë në Kosovë.
Sipas komunikatës nga Kryeministria, Kurti e ka njoftuar shefin e EULEX-it me zhvillimet e fundit në vend dhe reformat e ndërmarra deri më tani.
Ai e veçoi procesin pozitiv të regjistrimit të automjeteve me targat legale të Kosovës, RKS, si shembull i respektimit të ligjshmërisë, rezultat i lehtësimit financiar të ofruar nga Qeveria, dhe gatishmërisë së qytetarëve për integrim.
Gjatë takimit u fol edhe për rëndësinë e bashkëpunimit ndërinstitucional në shërbim të të gjithë qytetarëve e Kosovës, thuhet në komunikatë. /Telegrafi/
