Web Analytics
E diel, 26 Maj, 2024
17.2 C
Pristina

Rashiq reagon për deklaratat e Vuçiq-it: Vuçiqi s’mund të thotë asnjë fjali pa gënjyer e manipuluar

Ministri për Komunitete dhe Kthim në Qeverinë e Kosovës, Nenad Rashiq, ka folur se si ka kaluar nata në Banjskë të Zveçanit, për zhvillimet e fundit atje dhe rreth deklaratave të presidentit serb, Aleksandar Vuçijq.

Sipas tij, nata në Banjska ka kaluar e qetë, pavarësisht se ngjarja tragjike e ndodhur dje, fatkeqësisht do të prodhojë disa efekte të reja.

“Askush nuk e di se çfarë mund të ndodhë më pas. Dje ka qenë në aksion një lloj formacioni paraushtarak që veproi në një mënyrë që, së pari, për mendimin tim, është absolutisht jonormale”, ka thënë fillimisht Rashiq.

Kjo, sipas tij, i vë serbët nën presionin dhe stresin që ndodh çdo ditë jo vetëm afër Banjskës por edhe në të gjitha vendet e tjera ku ata jetojnë.

Ai ka komentuar edhe konferencën për shtyp të presidentit të Serbisë, Aleksandar Vuçiq.

Sipas tij, “aty u konfirmua edhe një herë se presidenti Vuçiq nuk mund të thotë asnjë fjali të zgjatur pa gënjeshtra, insinuata dhe manipulime”.

Ndryshe, Policia e Kosovës më 24 shtator u sulmua nga grupe kriminale në veri, ku u vra polici Afrim Bunjaku, një tjetër polic u plagos dhe një u lëndua.

Pas aktit terrorist, rreth 30 persona të armatosur u fshehën në manastirin në Banjskë.

Policia e Kosovës ftoi personat e armatosur të dorëzohen por ata vazhduan me sulme ndaj policisë.

Policia njoftoi gjatë ditës së diel, se janë vrarë tre sulmues, si dhe ka arritur të arrestojë dy sulmues, dhe katër persona tjerë të cilët dyshohen se janë përfshirë me sulmin terrorist. /Telegrafi/

Të fundit