Një incident i pazakontë ka ndodhur pranë Manchesterit, ku policia ka sekuestruar pesë Lamborghini dhe një Mercedes G-Class, pasi drejtuesit e tyre dyshohet se po kryenin manovra të rrezikshme në autostradë, duke arritur deri në shpejtësinë alarmante prej vetëm 27 kilometrash në orë.
Ngjarja ka filluar kur policia e Manchesterit të Madh mori raportime për një grup automjetesh luksoze që po lëviznin me shpejtësi të madhe në autostradën M66. Sipas dëshmive, drejtuesit e këtyre automjeteve po ndërronin korsitë në mënyrë të rrezikshme dhe po rrotullonin gomat, duke e ulur shpejtësinë në rreth 17 milje në orë, ose afërsisht 27 km/h.
Pas marrjes së këtyre informacioneve, policia ka arritur të lokalizojë kolonën në autostradën M62. Dy nga Lamborghini u ndalën teksa po dilnin nga autostrada, ndërsa zyrtarët policorë përdorën taktika të specializuara për të ndaluar automjetet e tjera në Rochdale.
Pas përfundimit të operacionit, policia ka sekuestruar pesë Lamborghini dhe një Mercedes G-Class. Këto automjete janë marrë në bazë të nenit 59 të Police Reform Act 2002, ndërsa drejtuesit e tyre përballen me procedura për disa shkelje të rregullave të trafikut.
Inspektori Danny Kabal theksoi se policia nuk do të tolerojë vozitjen e pakujdesshme, antisociale apo të rrezikshme. Ai paralajmëroi se ata që e trajtojnë rrugën si pistë garash mund të përballen me sekuestrimin e automjeteve dhe procedura ligjore të rrepta.
Ndryshimet e fundit ligjore i japin mundësi autoriteteve britanike që, në rrethana të caktuara, të sekuestrojnë automjetet pa pasur nevojë për një paralajmërim paraprak ndaj drejtuesve.
